Taldyqorǵanda qoǵamdyq kóliktiń jolaqysy qymbattaýy múmkin
TALDYQORǴAN.QazAqparat - Taldyqorǵanda qoǵamdyq kólik aqysy qymbattaýy múmkin, dep habarlaıdy QazAqparat tilshisi.
Osyǵan baılanysty qalalyq ákimdiktiń áleýmettik jelidegi resmı paraqshasynda aqparat jarııalandy.
«Sońǵy ret qalalyq qoǵamdyq kólikterde jol júrý aqysy 2015 jyly kóktemde ózgertilgen bolatyn jáne ol 60 teńgeni qurady. 2015, 2016, 2017 jyldar aralyǵynda jolaýshylardy tasymaldaýshy mekemeler qozǵalys quramyn jańa 23 avtobýspen tolyqtyrdy, onyń 10-y úlken syıymdylyqtaǵy avtobýstar.
Qazirgi ýaqytta qosalqy bólshekterdiń, janar - jaǵarmaıdyń jáne kólik quraldaryna kórsetiletin qyzmetterdiń baǵasy 60 -70 % - ǵa kóterildi. Jolaýshylardy tasymaldaýshy mekemeler jol júrý aqysyn kóterý týraly birneshe ret esep bergen bolatyn. Kórsetilgen esepter boıynsha 2015 jylmen salystyrǵanda janar-jaǵarmaı 99 teńgeden 147 teńgege deıin artqan. 2015 jyldan beri júrgizýshilerdiń de jalaqylary kóterilmegen. Esepter QR Kólik jene komýnıkatsııa mınıstrliginiń 13 qazan 2011 jylǵy № 614, qalaishilik turaqty jolaýshy tasymaldaý baǵyttarynyń jol júrý tarıfterin bekitý týraly ádis - tásilimen eseptelgen, keltirilgen esepterdiń ortasha tarıf quny - 130 teńgeni qurady.
Tasymaldaýshy mekemeler jol júrý qunynyń arzandyǵyna baılanysty óz shyǵyndaryn jaba almaýda, qalalyq jeli baǵyttarynyń kópshiligi qosalqy bólshekterdiń jáne taǵy basqa kerek - jaraqtyń qymbattaýyna baılanysty tıimsiz bolyp otyr. Sonyń saldarynan jolaýshylarǵa qyzmet kórsetý sapasy tómendep ketti, sebebi buzylǵan avtobýstarǵa ýaqytyly jóndeý jumystaryn júrgize almaıdy, jumysshylarǵa jalaqy tóleı almaıdy.
«Taldyqorǵan qalasyndaǵy jol júrý quny QR boıynsha eń tómengi tarıfterdiń biri bolyp tabylady, sol sebepti qalalyq qoǵamdyq kóliktegi jol júrý qunyn qymbattatýǵa qajettilik týyp otyr», - delingen.
Ázirge jol júrý quny naqty qansha teńge bolatyny belgisiz. Ákimdik, basqa qalalardaǵy qoǵamdyq kólikterdiń de baǵasyn jarııalaǵan.
