Taldyqorǵanda Keńes Odaǵynyń batyry Musabek Seńgirbaevqa eskertkish músin ashyldy

TALDYQORǴAN. QazAqparat - Taldyqorǵan áskerı-tehnıkalyq mektebinde Keńes Odaǵynyń batyry, 28 panfılovshynyń biri Musabek Seńgirbaevqa eskertkish músin ashyldy, - dep habarlaıdy «QazAqparat» HAA tilshisi.

Batyr músini Bolashaq ofıtserler men sarbazdardy tárbıeleıtin bilim ordasyndaǵy Áskerı dańq mýzeıinde oryn tepti. Musabek Seńgirbaevtyń urpaqtary atalarynyń erligi jastarǵa patrıottyq tárbıe berip, Otan qorǵaýshylardyń rýhanı shyńdalýyna úles qosady degen senimde. Keńes Odaǵynyń batyry Máskeý qalasyn qorǵaýda  qolyndaǵy granatasymen jaý tankisine qaraı umtylyp, erekshe erlik kórsetken bolatyn.

 

Musabek Seńgirbaev 1917 jyly Almaty oblysy, Kóksý aýdany, Qyzylaryq aýylynda dúnıege kelgen. Jas jaýynger 1941 jyly maıdanǵa attanyp, Máskeý túbindegi Volokolam aýdany, Dýbosekovo aýylynda Otanyn qorǵaýda erlikpen qaza tapty. Ekinshi dúnıejúzilik soǵysta kórsetken erjúrektiligi úshin Keńes Odaǵynyń batyry ataǵy beriledi.