Taldyqorǵanda qaıtys bolǵan baladan menıngıt anyqtalmady - Densaýlyq mınıstrligi

ASTANA. QazAqparat - QR Densaýlyq saqtaý mınıstrliginiń Qoǵamdyq densaýlyqty saqtaý komıteti Taldyqorǵanda balanyń menıngıtten ólýine qatysty túsinik berdi. Bul jaıynda atalǵan vedomstvonyń baspasóz qyzmetinen málim etti, dep habarlaıdy QazAqparat.

«Qazaqstan Respýblıkasy Densaýlyq saqtaý mınıstrliginiń Qoǵamdyq densaýlyqty qorǵaý komıteti mamandarynyń málimetinshe, Taldyqorǵan qalasyndaǵy №1 balabaqshada qaıtys bolǵan balanyń mınıngıtti sol tárbıe berý uıymynda juqtyrmaǵany anyqtaldy. QR DSM QDQK mamandary epıdemııaǵa qarsy qajetti barlyq zerthanalyq sharalardy júrgizdi. Bakterıologııalyq zertteýler nátıjesi kórsetkendeı, atalǵan mektepke deıingi mekemeniń birde-bir qyzmetkerinen jáne tárbıelenýshilerinen aýrý belgileri tabylǵan joq. Bul qaıǵyly jaıt birinshi ret bolyp otyr. Bul, balanyń aýrýdy balabaqsha aýmaǵynan tys jerde juqtyrǵanyn kórsetedi», - delingen taratylǵan aqparatta.

Vedomstvonyń atap ótýinshe, qaza bolǵan balamen baılanysta bolǵan barlyq adamdardy medıtsına qyzmetkerleri tekserip, der ýaqytynda oqshaýlady. Balalar men eresek adamdar 10 kún boıy dárigerlerdiń baqylaýynda bolady.

«Osy jyldyń 30 maýsymynda menıngokokk ınfektsııasyn juqtyrý kúdigimen ınfektsııalyq aýrýhanaǵa túsken ekinshi balaǵa qatysty aıtarymyz, aldyn ala júrgizilgen zerthanalyq zertteýler teris nátıje kórsetti. Qazirgi ýaqytta bala em alyp jatyr jáne dárigerlerdiń baqylaýynda», - dep habarlady mınıstrlikten.

Esterińizge sala ketsek, 29 maýsym kúni Taldyqorǵandaǵy oblystyq balalar aýrýhanasynda 4 jastaǵy sábı mınıngıt dıagnozymen túsip, sol kúni kóz jumǵan edi.