Taldyqorǵanda qaıtys bolǵan áýejaı qyzmetkeriniń artynda úsh balasy qaldy
TALDYQORǴAN.QazAqparat - Taldyqorǵanda qaıtys bolǵan áýejaı qyzmetkeriniń artynda úsh balasy jáne jary qaldy. 38 jasynda taǵdyry qyrshynnan qıylǵan Rústem Musabekovti jaqyndary erteń jer qoınyna tapsyrady, dep habarlaıdy QazAqparat tilshisi.
Rústem Musabekovtiń tuńǵyshy 15 jasta bolsa, kenjesi 4-ke endi tolǵan. Marqum bolǵan azamat otbasynda úsh aǵaıyndy. Ózi úıdiń úlkeni. Anasy Botagóz Ómirzaqova ulynyń qazasyna áli de sener alar emes.
«El de, aeroport qyzmetkerleri de rıza, rahmetterin aıtyp jatyr. Balańyz batyr dep jatyr. Sol sózdiń ózi maǵan úlken demeý. Balalarynyń esinde ákeleri máńgi batyr bolyp qalsa deımin», - deıdi ol.
«Jumys barysynda qaza tapqan azamattardyń otbasylaryna ótemaqy beriledi. Biraq tergeý amaldary bitip, órttiń sebep saldary tolyq anyqtalǵannan keıin ǵana qarjy máselesi qarastyrylady. Degenmen áýejaı qyzmetkerleri ózderi qarjy jınap, otbasyna kómektesip jatyr», -deıdi «Jetisý» avıakompanııasy» AQ prezıdenti Qalmuhamet Dóńsebaev.
Esterińizge sala keteıik, ótken beısenbide Taldyqorǵan áýejaıynyń janar-jaǵarmaı qoımasynda órt shyǵyp, ony eki azamat ózdigimen óshirýge tyrysqan. Ózderi otqa oransa da bar kúshimen janarmaı quıylatyn qubyrdyń burandasyn jaýyp, úlken apattyń aldyn aldy. Áýe qaýipsizdigi qyzmetiniń ınspektory bolǵan 1973 jylǵy Rahat Kámetaevtyń denesiniń 95 paıyzyn kúıik shalyp, ol aýrýhanaǵa jetkizilgennen keıin kóp uzamaı kóz jumdy. Al Rústem Musabekovtyń ómirin aman alyp qalý úshin mamandar Almatydan da shaqyryldy. Biraq onyń alǵan jaraqaty tym aýyr boldy. Bes kún boıy jansaqtaý bóliminde jatqan Rústem Musabekov esin jımastan qaıtys boldy.
