Taldyqorǵanda karantın shekteýlerine birqatar ózgeris engizildi

TALDYQORǴAN. QazAqparat – Taldyqorǵan qalasynyń bas memlekettik sanıtarlyq dárigeri Ermek Asımqulov karantın rejımine qatysty qaýlyǵa ózgerister men tolyqtyrýlar engizdi, dep habarlaıdy QazAqparat tilshisi.

Jańa qaýlyǵa sáıkes, shaharda jalpy bilim beretin mektepterdegi 5, 6, 7, 8 jáne 10 synyptar úshin onlaın oqý uzartyldy. Mektepke baratyn balalar nemese eńbek ujymy arasynda COVID-19 ınfektsııasyn juqtyrýdyń bir jaǵdaıy tirkelgen bolsa, ınkýbatsııalyq kezeńniń sońyna deıin bilim ordasy karantınge jabylady.

«Kúsheıtilgen sanıtarlyq-dezınfektsııalyq jáne maska rejımi saqtalǵan jaǵdaıda bilim berý mekemelerinde, onyń ishinde kolledjder men ýnıversıtetterde qoǵamdyq tamaqtaný oryndary qaıta ashylady. Biraq kelýshiler sany jalpy orynnyń 30%-nan aspaýy tıis. Balalarǵa arnalǵan túzetý jáne qosymsha bilim berý ortalyqtarynyń qyzmetine ruqsat berildi. Talap boıynsha aldyn ala jazylý júrgizilip, ár topta 15 adamnan aspaýy qajet», - delingen qujatta.

Sondaı-aq sport zaldary, fıtnes ortalyqtar, basseınder, qoǵamdyq monshalar men saýnalar qaıta ashyldy.

Jańa qaýly 22 aqpanda saǵat 7:00-den bastap kúshine enedi.