Taldyqorǵanda qala kúni aıasynda densaýlyq festıvali ótti
TALDYQORǴAN.QazAqparat - Taldyqorǵanda qala kúni merekesi aıasynda densaýlyq festıvali ótti. Sharaǵa shahardyń mektepteri men arnaýly jáne joǵary oqý oryndarynyń ujymdary, sondaı-aq sportty serik etken qala turǵyndary bul sharaǵa belsene qatysty, dep habarlaıdy QazAqparat tilshisi.
«Jastar» sport saraıy aldyna jınalǵan myńnan asa qatysýshy «Jastar» saıabaǵyna deıin júrip kelip, birlese jattyǵý jasady. Jıylǵan jurtshylyqqa tanymal sport ardageri Álimǵazy Raıymbekov qarııa batasyn berip, sporttyń adam ómirindegi mańyzyna toqtaldy.
«Meniń osy jasqa deıin tik turyp, tik júrýim sporttyń arqasy. Ónerge de, kınoǵa da osy sporttyń arqasynda keldim. Sondyqtan, barlyqtaryńyzdy sportpen shuǵyldanýǵa shaqyramyn! Kez kelgen maqsatqa sportpen birge jetý ońaı», - dedi Álimǵazy qarııa.
Taldyqorǵan qalalyq sport bóliminiń basshysy Ádilet Rymtaıuly atap ótkendeı, «Densaýlyq festıvalin» qalalyq ákimdik, densaýlyq saqtaý basqarmasy jáne salaýatty ómir saltyn qalyptastyrý ortalyǵy birlesip ótkizýde. Aıasynda túrli flesh-mobtar men sporttyq oıyndardan qoıylymdar josparlanǵan. Al, dárigerler óz kezeginde qala turǵyndaryn saıabaqta qabyldap, densaýlyqtaryn túzeý boıynsha aqyl-keńester berýde.
Aıta ketý kerek, Taldyqorǵanda qala kúnine arnalǵan mrekelik sharalar 8-shi qyzrkúıekten basataldy. Túrli shyǵarmashylyq baıqaýlar,sheberlik sabaqtary, retro kontsertter men sporttyq saıystar, tanymal tulǵalarmen kezdesýler, áleýmettik nysandardyń ashylýy, kásiporyndardyń tusaýkeserleri sekildi kóptegen sharalar bıylǵy merekeniń sánin kirgizetin bolady. Al, negizgi mereke 30-qyrkúıekte saǵat 10-00-de qalanyń ortalyǵynan bastalyp, Jastar sport saraıynyń mańy men «Jastar» saıabaǵynda jalǵasady.
