Taldyqorǵanda izdeýde júrgen alaıaq Astanadan ustaldy
TALDYQORǴAN. QazAqparat - Almaty oblysynda kólikterdi alaıaqtyq jasap saýdalap júrgen taldyqorǵandyq azamat Astanada ustaldy. Kúdiktige Qazaqstan aýmaǵy boıynsha izdeý jarııalanǵan bolatyn, dep habarlaıdy QazAqparat tilshisi.
Taldyqorǵan qalasynyń polıtseıleri 29 jastaǵy er azamattyń Astana qalasynda júrgenin anyqtap, qolǵa túsirgen. Almaty oblysyna jetkizilgen kúdiktiniń qymbat kólikterdi saýdalaý boıynsha 16 alaıaqtyq faktige qatysy bar ekeni naqtylanyp otyr.
Almaty oblystyq ІІD baspasóz qyzmetiniń məlimetinshe, jábirlenýshilerge 20 mln teńgeden astam materıaldyq shyǵyn keltirilgen. Olardyń 10-y Taldyqorǵan qalasynan bolsa, 6 adam Almaty qalasynan. Basym bóligi kúdiktiniń jaqyn tanystary bolyp shyqty. Qazirgi tańda sotqa deıingi tergeý amaldary júrgizilýde.
