Taldyqorǵanda halyqaralyq jyrshylar festıvali ótti

TALDYQORǴAN. QazAqparat - Taldyqorǵanda Orbulaq shaıqasynyń 375 jyldyǵyna oraı «Asyl mura» atty jyrshylardyń halyqaralyq festıval-sherýi ótti. Sharaǵa túrkitildes elderdiń 10-nan astam jyrshysy keldi, dep habarlaıdy QazAqparat tilshisi.

Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda uıymdastyrylǵan festıvalge Túrkııa, Qyrǵyzstan, Qaraqalpaqstan elderi men qazaqstandyq jyrshylar qatysyp, ulttyq ónerlerin qalyń jurtqa pash etti. Festıval maqsaty - ulttyq ónerimizdi saqtap, keıingi urpaqqa jetkizý jolynda jyrshy-jyraýlardyń esimderin keńinen nasıhattaý. Jyrshylardyń shyǵarmashylyǵyn óskeleń urpaqqa úlgi ete otyryp,  elimizdegi jyrshylyq dástúrdi qaıta jańǵyrtý. Jas urpaqty ulttyq ónerimizdiń qyr-syryna baýlyp, ádebıeti men tarıhyn tanýǵa múmkindik jasap, óner sheberleriniń shyǵarmashylyǵyna tyń serpin berý, deıdi uıymdastyrýshylar.

Túrkııanyń Ankara qalasynan kelgen halyqaralyq baıqaýlardyń laýreaty, jyrshy Irfan Gıýrdal jyraýlyq óner túrki dúnıesin biriktiretinin aıtady. Jyrlar men dastandar bárimizge ortaq qazyna dep atap ótken óner ıesi festıvalde «Kóroǵlý» dastanyn oryndady.