Taldyqorǵanda halyqaralyq standartqa saı basseın salynady
TALDYQORǴAN.QazAqparat - Taldyqorǵanda jaqyn arada jabyq júzý basseıni salyna bastaıdy. Ol «Jastar» saıabaǵyna jalǵasa, jańa ońtústik-batys turǵyn aımaǵynda ornalaspaq. Bul týraly jıyn barysynda oblys ákimi Amandyq Batalov aıtty, - dep habarlaıdy QazAqparat Almaty oblysy ákiminiń baspasóz qyzmetine silteme jasap.
Jańa júzý basseıniniń qurylysy kelesi jyldyń basynda bastalady. Nysan eki jyldan keıin paıdalanýǵa beriledi dep kútilýde. Olımpıadalyq standarttarǵa sáıkes salynatyn basseın alańy 27 myń sharshy metrdi quraıdy. Taǵy bir ereksheligi - sáýlettik keıpi balyq sulbasyna uqsaǵan.
"Biz qashanda sportqa erekshe mán berýge tyrysamyz, óıtkeni sport - ulttyń saýlyǵy. Bul týraly Memleket basshysy Nursultan Ábishuly Nazarbaev únemi aıtyp júredi. Sondyqtan elimizde teńdesi joq basseın salýdy qolǵa almaqpyz. Bul ýaqyt óte kele Taldyqorǵandy sý sporty túrleriniń ortalyǵyna aınaldyrýǵa múmkindik beredi dep oılaımyn", - dedi Amandyq Batalov.
Sonymen qatar óńir basshysy jańa basseınde álemdik deńgeıdegi jarystar ótkizýge bolatynyn aıtty. Sebebi jańa ǵımarat 4 basseındi qamtıtyn bolady. Ekeýiniń uzyndyǵy 50 metrden, eni 25 metrden, taǵy ekeýi olımpıadalyq oıyndarǵa arnalǵan: bireýi jattyǵýǵa, ekinshisi jarysqa laıyqtalǵan.
"Munda sý sporty túrlerinen álem chempıonatyn ótkizýge bolady. Al jarystardan tys ýaqytta qalalyqtar osy ǵımaratta júzýmen aınalysýǵa múmkindik alady. 50 metrge júzýdi árkim de qalaıtyn shyǵar. Munda eń úzdik jattyqtyrýshylar jumys istep, bolashaq chempıondardyń shynyǵýyna qajetti barlyq jaǵdaılar jasalady. Munyń bári - halyqtyń ıgiligi úshin", - dedi oblys ákimi A. Batalov sózin qorytyndylap.
«Plıýs Aktsent» JShS sáýletshisi Esim Mamanovtyń aıtýynsha, basseın qurylysyn jobalaý kezinde onyń kóp salalyǵyna, jaılylyǵyna jáne estetıkalyq keıpine nazar aýdarylǵan.
"Ǵımarat jer deńgeıinen tómen, al trıbýna deńgeıi 3 metrge joǵary salynady. Amfıtetar formasynda bolmaq. Bul kórermenderdiń sportshylardyń árbir qımylyn jiti baqylaýyna múmkindik berý úshin jasalyp otyr. Taǵy 5, 7, 10 metrlik tramplınder josparlanǵan. Sonymen qatar basseındi sınhrondy júzý úshin paıdalanýǵa bolady. Basseındi qalanyń kórnekti oryndarynyń birine aınaldyrý - aldymyzǵa qoıylǵan maqsattyń biri. Sondyqtan onyń syrtqy kelbetine erekshe talǵammen qaradyq. Eń sońynda balyq keıpine uqsaıtyn formaǵa kelip toqtaldyq", - dedi Esim Mamanov.
Jalpy jabyq basseın jertólesi bar úsh qabatty ǵımarat bolmaq. Ámbebap basseın júzý, akvaaerobıka, sýdaǵy shógen, sýǵa sekirý boıynsha oqý-jattyǵý ótkizýge, turǵyndar úshin saýyqtyrýǵa arnalǵan júzýge, balalardy júzýge úıretýge, sol sııaqty kórermenderdiń qatysýymen ótetin jarystarǵa arnalǵan. Kórermender trıbýnasyna 2 myń adam sııady. Sondaı-aq múmkindigi shekteýli azamattardyń da júzýmen aınalysýyna jaǵdaı jasalady.
