Taldyqorǵanda gaz tartyp beremin dep turǵyndardy aldaǵan kúdikti ustaldy
TALDYQORǴAN.QazAqparat - Taldyqorǵanda gaz tartyp beremin dep eldi aldady degen kúdikpen 1992 jylǵy turǵyn ustaldy. Qazir kúdiktiniń ústinen QR QK 190 babynyń (Alaıaqtyq) 3 bóligi 3 tarmaǵy boıynsha is qozǵaldy, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, kúdiktiniń ústinen búgingi kúni 22 aryz túsken. Ázirge turǵyndarǵa keltirilgen shyǵyn kólemi eseptelip jatyr.
Taldyqorǵandyq Ádil Kákılat gaz tartatyn kompanııanyń «ókiline» aldanǵandardyń birimin deıdi. Onyń sózinshe, bireýlerden Dáýren atty jigittiń nómirin alypty. Ol ózin «Gaztrans Aımaq» seriktestiginiń qyzmetkerimin dep tanystyrǵan. Sodan eki jaq kelisim-shart jasasqan. Jalǵan Merdiger kógildir otyn júretin qubyrdy úıdiń ishine deıin kirgizgeni úshin 100 myń teńge alǵan da, izin sýytqan.
«Biz bárin qatyramyz dedi, sosyn aqshany berdik», - deıdi zeınetker Ádil Kákılat.
Al jalǵan merdiger júrgizgen qubyrlardyń kóbi talapqa saı emes eken. Sondyqtan, gazǵa qosýǵa ruqsat berilmeı tur. ıAǵnı, turǵyndardyń taǵy shyǵyndalýyna týra keledi.
