Taldyqorǵanda etti qymbat satqan kásipkerler saýda ornynan qýyldy
TALDYQORǴAN.QazAqparat - Taldyqorǵanda kommýnaldyq bazarda et baǵasyn kótergendermen kelisimshart toqtatyldy, dep habarlaıdy Qazaqparat tilshisi.
Dástúrli senbilik jármeńkede et baǵasyn negizsiz qymbattatqan kásipkerler saýda ornynan qýyldy. Olar sıyr, qoı etine bir baǵa qoıyp, ózderi ekinshi baǵamen saýdalaǵan. Dálirek aıtqanda 1200 teńge dep kórsetilgen etti arnaıy komıssııa júrip ótkennen keıin 1500 teńgege satyp otyrǵan.
Turǵyndardyń narazylyǵyn eskergen qala ákimshiligi 13 kásipkermen kelisimshartty buzdy. Taǵy 4 et satýshyǵa eskertý jasaldy. Jalpy «Jeruıyq» kommýnaldyq bazary baǵa turaqtylyǵyn qamtamasyz etý maqsatynda ashylǵan. Negizgi azyq-túlikti qaladaǵy basqa da bazarlarmen salystyrǵanda arzanyraq satýdy kózdeıdi. Ol úshin bul jerde saýda jasaıtyndarǵa jeńildikter qarastyrylyp otyr.
