Taldyqorǵanda et kombınatynyń irgetasy qalandy
TALDYQORǴAN. QazAqparat - Taldyqorǵanda et kombınatynyń irgetasy qalandy. Bul Qazaqstan men Qytaı ınvestorlarynyń birlesken jobasy, dep habarlaıdy QazAqparat tilshisi.
«Lýnıýan Jetisý» dep atalatyn et óńdeý kombınatynyń quryltaıshysy belgili kásipker - Bolat Ábilov. Aıtýynsha, jobanyń alǵashqy kezeńinde 15 mln AQSh dollary kóleminde ınvestıtsııa tartylady. Al, klaster tolyq iske qosylǵanda, ınvestıtsııa kólemi 80-100 mln AQSh dollaryna jetetin bolady. «Búginde «Lýnıýan Jetisý» kompanııasy resmı túrde Taldyqorǵanǵa tirkelip, esepshotyn ashty. Aldaǵy ýaqytta munda tek jergilikti azamattar jumys isteıtin bolady» dep atap ótti kásipker óz sózinde.
«Lýnıýan» kompanııasynyń jetekshisi ıAn Gýan Hýanyń aıtýynsha, bul et kombınaty ǵylymı jetistikterge negizdelgen, ekologııalyq sapaly, standartqa saı ónim shyǵaratyn bolady. «Biz tek paıda tabý úshin kelip otyrǵanymyz joq. Eki memleket basshylarynyń kelisimin oryndaý úshin jáne qoǵam aldyndaǵy jaýapkershiligimizdi sezine kelip otyrmyz. Aldaǵy ýaqytta osy sózimizdiń dáleli retinde óńirge balabaqsha ǵımaratyn salyp beretin bolamyz», dedi qytaılyq ınvestor. Qazaqstan men Qytaıdyń birlesken et kombınatynyń qurylysy qyrkúıek aıynda aıaqtalady dep josparlanyp otyr. Soıý jáne tehnologııalyq jeli jylyna 50 myń bas iri-qarany soıýǵa eseptelgen.
