Taldyqorǵanda Eskeldi bıdiń 325 jyldyǵy atalyp ótti

TALDYQORǴAN. QazAqparat- Taldyqorǵanda Eskeldi bı Jylgeldiulynyń 325 jyldyǵyna arnalǵan respýblıkalyq aqyndar aıtysy ótti, dep habarlaıdy Qazaqparat tilshisi.

«Erligi mura- Eskeldi bı» atty óner dodasy Elbasy Nursultan Nazarbaevtyń «Bolashaqqa baǵdar: Rýhanı jańǵyrý» baǵdarlamalyq maqalasy aıasynda uıymdastyrylyp otyr.
 

Jetisýlyqtardyń delebesin qozdyrǵan aıtysqa 5 oblys, 3 qaladan 10 aqyn qatysyp, ózara myqtyny anyqtady. Olardyń qatarynda Aınur Tursynbaeva, Balǵynbek Imashev, Sara Toqtamysqyzy, Jandarbek Bulǵaqov syndy azýly aqyndar men jas aqyndar da bar.
 

Sharanyń basty maqsaty eli úshin eńbek etken tarıhı tulǵanyń ómirin, erlikteri men tóreligin aqyndar tilimen nasıhattaý.

Eskeldi bıdiń el bilmeıtin tustaryn urpaqqa aıtyp, búgingi kúnniń ózekti máselelerine de toqtalý. Aqyndar ázil-qaljyńdy aralastyra otyryp, qoǵamda oryn alǵan keıbir problemalardy kóterip, latyn álipbıine kóshý, til men din, rýhanı jańǵyrý syndy basqa da taqyryptardy qamtyp otyrdy.