Taldyqorǵanda er adamnyń máıiti tabylǵan páterdegi órt temekiden tutanýy múmkin - TJD
TALDYQORǴAN.QazAqparat - Taldyqorǵanda er adamnyń máıiti tabylǵan páter órtine temeki tuqyly sebep bolýy múmkin. Bul jóninde Almaty oblystyq Tótenshe jaǵdaılar departamentiniń baspasóz qyzmeti málimdedi, - dep habarlaıdy QazAqparat tilshisi.
«Aldyn ala boljam boıynsha qyzyl jalyn shoǵy sónbegen temekiden shyǵýy múmkin», - delingen vedomstvonyń resmı málimdemesinde.
Órt sóndirý qyzmetine páterdiń órtenip jatqandyǵy jóninde habarlama búgin saǵat 16:02 de túsken. Oqıǵa ornyna jetken mamandar 1949 jylǵy er adamnyń múrdesin tapqan. Bes qabatty úıden 40 adam oqshaýlanǵan. Onyń 14-i bala. Tilsiz jaý 29 sharshy metr jerdi qamtyǵan. Saǵat 16:36 sóndirilgen órtke 30 maman men 10 tehnıka jumyldyrylǵan.
Aıta keteıik, oqys oqıǵa Taldyqorǵandaǵy «Músheltoı» shaǵyn aýdanyndaǵy bes qabatty úıdiń tórtinshi qabatynda boldy.
Esterińizge sala keteıik, buǵan deıin Taldyqorǵanda páter órtenip, 1949 jylǵy er adamnyń máıiti tabylǵanyn habarlaǵan bolatynbyz.
