Taldyqorǵanda elektrondyq hattamalar toltyryla bastady
TALDYQORǴAN. QazAqparat - Almaty oblysy boıynsha eń alǵash elektrondyq hattamalar Taldyqorǵan qalasynda toltyryla bastady. Bir aıdyń ishinde 30-dan astam ákimshilik quqyq buzǵan azamatqa oqıǵa ornynda hattama toltyrylyp berildi, dep habarlaıdy Qazaqparat tilshisi.
Qaǵazbastylyqtan qutylýdy maqsat etken bul joba sybaılas jemqorlyqtyń jolyn kesýge baǵyttalǵan. Oblys ortalyǵynda jolda júrý erejesin saqtamaı nemese basqa da ákimshilik zańbuzýshylyqqa jol bergen tulǵalarǵa arnaıy baǵdarlamalar ornatylǵan planshet arqyly hattama toltyrylyp, qolma-qol sol jerde shyǵarylyp beriledi.
Mundaı ádistiń taǵy bir ereksheligi árbir zań buzý faktisi týraly málimet birden Іshki ister mınıstrliginiń derekqoryna engiziledi.
Qala prokýrory Artyqbek Pashaevtyń aıtýynsha, bul bastama memlekettik organdar men halyq arasyndaǵy ashyqtyqty qamtamasyz etedi. Sondaı-aq kóz qysty, barmaq basty áreketterdiń joly kesiledi degen pikirde.
Qazirgi tańda taldyqorǵandyq tártip saqshylary synaq retinde 3 jańa elektrondy hattama toltyrý keshenimen qamtamasyz etilgen.
