Taldyqorǵanda EKSPO-ny syltaýratyp aqsha jınaǵan alaıaqtar paıda boldy
TALDYQORǴAN. QazAqparat - Taldyqorǵanda belgisiz bireýler qala ákimidiginiń atyn jamylyp, «EKSPO-2017» kórmesi aıasynda shaharǵa qurylys jumystaryn júrgizý qajet degen jeleýmen halyqtan aqsha jınap júr, dep habarlaıdy QazAqparat tilshisi.
Qalalyq ákimdikke shaǵymdanǵan turǵyndardyń biri kóshede 3 qyz bala men 2 er bala qoldaryna paraqshalar ustap, keminde 500 teńge ótkizý kerek dep júrgenin eskertti. Qazirgi tańda aqparatty naqtylaý úshin quzyrly organdar aralasty. Al paraqshada Elbasynyń Jarlyǵymen 2017 jyldyń 10 shildesinen bastap el aýmaǵynda kórkem qala naýqany bastaldy delingen. Osyǵan oraı árbir qala turǵyny 500 teńgeden qarjy ótkizý kerek dep jazylǵan. Qatege toly bette bul qarajat aýlalardy jóndeýge jáne beınebaqylaý kameralaryn ornatýǵa jumsalatyndyǵy aıtylǵan.
Taldyqorǵan qalasynyń ákimdigi qala turǵyndary men qonaqtaryn saq bolýǵa shaqyrady. Eger de osyndaı alaıaqtarǵa jolyǵyp qalǵan jaǵdaıda dereý 102 nómirine habarlaýdy suraıdy.
