Taldyqorǵanda eki zeınetkerdi aldap ketti

TALDYQORǴAN. QazAqparat - Taldyqorǵanda telefon alaıaqtyǵynyń eki faktisi tirkeldi, dep habarlaıdy QazAqparat ІІM-ne silteme jasap.

«Zeınet jasyndaǵy eki áıeldiń de qyzdary avtokólikti ózderi júrgizedi. Alaıaqtar eki zeınetkerge telefon soǵyp, eki jaǵdaıda da olar ózderin tártip saqshysymyz dep tanystyrǵan. Olar bir stsenarıı boıynsha jumys isteıdi: qyzyńyz adamdy qaǵyp ketti, aýyr halde aýrýhanaǵa jatqyzylǵan adamǵa, sondaı-aq kólik apaty faktisi boıynsha qıyndyqtardy «sheshýge» shamamen 5 mln teńge qajet dep qońyraý shalady.

Jábirlenýshilerdiń biri alaıaqtarǵa 3,5 mln teńge berse, ekinshisi 1 mln teńgeden aıyrylǵan», - dep jazdy vedomstvodan.

Polıtsııa azamattarǵa alaıaqtardyń aıla-qýlyqtaryna túsip qalmaýdy eskertti. Beıtanys adamdarmen, ásirese telefon arqyly sóıleskende qyraǵy jáne abaı bolý kerek. Polıtseıler alaıaqtardyń áreketi týraly bilgen jaǵdaıda, dereý habarlaýdy suraıdy.