Taldyqorǵanda eki balany órtten qutqarǵan stýdent grantqa aýystyrylady
TALDYQORǴAN. QazAqparat - Taldyqorǵanda 6 naýryzda eki kishkentaı qyzdy órtten aman alyp qalǵan Arman Baqytbaı JOO-da aqyly bólimnen tegin bólimge aýystyrylady, dep habarlaıdy QazAqparat tilshisi.
Almaty oblysynyń ákimi Amandyq Batalov 19 jastaǵy Armandy qabyldap, qurmet kórsetti. Balanyń turmystyq jaǵdaıyn suraǵan ákim 1-shi kýrs stýdentin aqyly bólimnen ákim grantyna aýystyrýǵa kómektesetinin jetkizdi. Jetisý Memlekettik ýnıversıtetiniń dene shynyqtyrý jáne sport mamandyǵynda oqyp jatqan bolashaq muǵalim qazirgi ýaqytta oqýyna 433 myń teńge tóleıdi.
«Arman jaraısyń! Seniń jasaǵan erligin barlyq jastarǵa úlgi bolsyn. Biz seniń oqýynyń grant máselesine jáne qaryndasyna da tegin ákimniń bilim grantyn beretin bolamyz. Qaryndasyńa aıt, oqýǵa túsemin degende biz kómektesemiz», - dedi Almaty oblysynyń ákimi Amandyq Batalov.
Arman Baqytbaıdyń anasy 2011 jyly qaıtys bolǵan. Ákesi zeınetker. Artynan ergen jalǵyz qaryndasy bar. Ol qazir 8 synypta oqıdy.
Eske slaa keteıik, Arman Baqytbaı 6 naýryz kúni 8 jáne 2 jastaǵy kishkentaı qyzdardy órtten aman alyp qaldy.
«Osy úıdiń janynan ótip bara jatyr edim, eki búldirshinniń daýysyn estidim, órt boldy. «Qutqaryńyz, qutqaryńyz» degen. Ekinshi qabatqa shyǵyp qarasam, páterdiń esigi jabyq eken. Balalardy syrtynan qulypttap ketken. Ar jaǵynan maǵan tútinniń ıisi kele bastady. Balalardy úıden shyǵarý úshin úıdiń terezesinen kirip, olardy sol tereze arqyly aman-esen shyǵardym», dedi Arman Baqytbaı.
Abyroı bolǵanda páter órtenbegen. Qysqa tuıyqtalý saldarynan uzartqyshqa suǵýly turǵan uıaly telefonnyń qýattaǵyshy tútindepti. Al balalardyń ata-analary bul ýaqytta jumysta bolǵan.
