Taldyqorǵanda egde jastaǵy áıeldi tonaǵan urynyń qylmysy kameraǵa túsip qaldy
TALDYQORǴAN. QazAqparat - Taldyqorǵanda egde jastaǵy áıeldi tonaǵan urynyń qylmysy beınejazbaǵa túsip qaldy, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, Taldyqorǵan qalasy PB Batys polıtsııa bóliminiń kezekshi bólimine 66 jastaǵy jergilikti turǵyn tonalǵanyn aıtyp aryzdanǵan. «Jastar» shaǵyn aýdanynda belgisiz er adam áıelden ámııany, 85 000 teńgeden astam aqshasy, bank kartochkasy, jeke kýáligi jáne zeınetaqy kýáligi bar sómkesin alyp ketken. Atalǵan derek QR QK 191-babynyń 1-bóligi boıynsha SDTBT-de tirkeldi.
Kúdikti aqshany alyp, sómkeni, ámııandy jáne qujattardy qylmys ornyna jaqyn jerge laqtyryp jibergen.
Tártip saqshylary jedel túrde kúdiktiniń turǵan jerin anyqtap, ony ortalyq saıabaq aýmaǵynan ustady. Ustalǵan azamat oblys ortalyǵynyń esh jerde jumys istemeıtin 19 jastaǵy turǵyny bolyp shyqty.
Qaraqshylyq deregi túsip qalǵan beınejazba men basqa da dáleldemeler usynylǵannan keıin, ol aqshany óziniń jeke qajettilikterine jumsaǵanyn jetkizip, qylmys jasaǵanyn moıyndady.
Tergeý barysynda ol sómkeni, ámııandy jáne qujattardy tastaǵan jerlerdi kórsetti.
Kúdikti QR QІJK 128-babyna sáıkes ýaqytsha ustaý oqshaýlaǵyshyna qamaqqa alyndy. Ózge aqparat tergeý múddesine saı jarııa etilmeıdi.
