Taldyqorǵanda dúnıege kelgen úshem perzenthanadan shyqty
TALDYQORǴAN. QazAqparat - Búgin Taldyqorǵan qalasyndaǵy oblystyq perınataldy ortalyqta dúnıege kelgen úshem úıine shyqty, dep habarlaıdy QazAqparat tilshisi.
Atalǵan perzenthanada 27 sáýir kúni ul balalardyń ekeýi 1 keli 800 gramm jáne biri 2 keli salmaqpen týǵan. Oblystyq perınataldy ortalyqtyń dırektory Qanat Jumashev perzenthanadan shyǵatyn kezde sábıler 500 gramǵa deıin salmaq qosqanyn aıtty.
«Balalar kesar tiligi arqyly dúnıege keldi. Perzenthanada bir aı boıyna úshem men anasynyń densaýlyǵyn qatań baqylaýǵa aldyq. Óıtkeni ýaqytynan buryn dúnıge kelgendikten kez-kelgen ýaqytta qıyndyq týýy múmkin. Qazir densaýlyqtary jaqsy, jaǵdaılary qalypty», - dedi perzenthananyń bas dárigeri.
Balalardyń ata-anasy Imanǵabylovtar Eskeldi bı aýdanyna qarasty Aldabergenov aýyldyq okrýginiń turǵyndary. Anasy 33 jastaǵy Marjan Imanǵabylova mektepte aǵylshyn tilinen sabaq beredi. Buǵan deıin eki balany dúnıege ákelgen Marjan endi kópbalaly ana atandy.
Eskeldi aýdandyq ortalyq aýrýhanasynyń bas dárigeri Roza Ibraeva úshemderge qajetti medıtsınalyq kómek kórsetiletinin aıtty.
«Úshemderdiń kútimine orta medıtsına qyzmetkerleri kómek kórsetedi. Ýchaskelik dáriger balalardyń densaýlyǵyn baqylaýda ustaıdy. Sonymen qatar úshemderdi balalarǵa arnalǵan tamaqpen qamtamasyz etetin bolamyz», - dedi bas dáriger.
Aıta keteıik, bıyl jalpy Almaty oblysynyń úsh otbasynda úshem dúnıege keldi.
