Taldyqorǵanda Tsıfrlyq HQO ashyldy

Onda memlekettik qyzmetter tolyqtaı avtomatty túrde usynylady. Bul protseske operatorlar qatyspaıdy, tek keńes berýshi mamandar qyzmet túrlerin alý boıynsha keńes beredi, dep habarlaıdy QazAqparat tilshisi.

Kelýshiler memlekettik qyzmetti «Connection point» ózine-ózi qyzmet kórsetý sektorlary arqyly alyp, vıdeqońyraýǵa arnalǵan bólmede memlekettik organdardyń basshylaryna óz saýaldaryn joldaı alady.

«Tsıfrlyq saýatty bolýdy ár adam ózinen bastaýy tıis. Kóptegen qyzmet túrleri elektrondyq formatqa aýysty, bul azamattardyń qyzmetterdi tıimdi jolmen ári tez alýyna yqpal etti. Jańa úlgidegi HQO-da halyqtyń tsıfrlyq saýatyn ashý maqsatynda tegin oqý synyby uıymdastyrylǵan. Oqý dáristeri aptanyń ár kúninde bekitilgen taqyryptar boıynsha saǵat 9:00-den 20:00 aralyǵynda júrgiziledi. «Tsıfrlyq Qazaqstan» memlekettik baǵdarlamasy aıasynda uıymdastyrylǵan oqý synybynda front-ofıs mamandary azamattarǵa egov.kz portalyn elektrondyq tsıfrlyq qoltańba arqyly paıdalaný joldaryn túsindirip, memlekettik qyzmetterge óz betinshe qol jetkizýdi úıretedi. Bir saǵatty quraıtyn saýat ashý kýrsyna kez kelgen adam qatysa alady», - deıdi «Azamattarǵa arnalǵan úkimet» memlekettik korporatsııasynyń Almaty oblysy boıynsha fılıalynyń dırektory Ermek Bekjúnisov. 

Aıta ketsek, dál osyndaı Tsıfrly HQO bıyl elimiz boıynsha Astana, Almaty, Shymkent, Qostanaı, Qyzylorda, Pavlodar, Atyraý qalalarynda ashylǵan. 

Búginde 2018 jyldyń qorytyndysy boıynsha «Azamattarǵa arnalǵan úkimet» memlekettik korporatsııasynyń Almaty oblysy boıynsha fılıaly 4 mıllıonǵa jýyq memlekettik qyzmet kórsetti. Onyń 60 paıyzy elektrondyq formatta usynylǵan.

Osyǵan deıin Almaty oblysynda terrorızmnen qorǵaný talaptaryn saqtamaǵan 31 nysanǵa aıyppul salynǵandyǵy habarlanǵan bolatyn.