Taldyqorǵanda byltyr ǵana tóselgen plıtalar qaıta aýystyrylyp jatyr
TALDYQORǴAN.QazAqparat - Taldyqorǵannyń ortalyq alańyndaǵy plıtalar bir jylǵa jetpeı qırap qaldy. Qazir búlingen plıtalardy qaıtadan aýystyryp jatyr, dep habarlaıdy QazAqparat tilshisi.
Byltyr jyl sońynda ortalyq alańǵa kúrdeli jóndeý jumystaryn «DSÝ 13» AQ júrgizgen bolatyn. Atalǵan kompanııanyń atqarǵan isi bir jylǵa da jetpeı syr berdi. Qazir alańdaǵy plıtalar synyp, jarylyp, búlingen. Endi arnaıy kepildemege sáıkes kompanııa aýystyrý jumystaryn óz qarajaty esebinen júrgizip jatyr.
««DSÝ 13» AQ jumysyna eki jyldyq kepil bergen. Onyń ýaqyty bitken joq. Sol sebepti olar óz qarajatyna aýystyryp jatyr. Óıtkeni, tóselgen plıtalardyń kóbisi qıraǵan, búlinip ketken», dedi Taldyqorǵan qalasy ákiminiń baspasóz qyzmetiniń ókili Danııar Seısenbaev.
Qazir bul jaıt taldyqorǵandyqtardyń arasynda qyzý talqylanyp jatyr. Turǵyndardyń basym bóligi bir isti eki ret jasap, shyǵynǵa batyp jatqan kompanııaǵa bul jaıt sabaq bolady degen oıda. Sebebi, merdiger ortalyq alańǵa kúrdeli jóndeý jumystaryn kúzdiń qara sýyǵynda júrgizgen bolatyn. Eske salaıyq, taldyqorǵandyqtar byltyr bul tósenishter aýystyryp jatqanda da áleýmettik jeli arqyly narazylyqtaryn bildirdi.
«Jańa plıtalardy aýystyrǵansha, oıdym-oıdym sapasyz joldardy jóndese» degen edi.
