Taldyqorǵanda burynǵy polıtsııa basshysy Serik Kúdebaevtyń soty keıinge qaldy

TALDYQORǴAN.QazAqparat - Búgin saǵat 11:00 de Taldyqorǵandaǵy oblystyq sotta Kúdebaevqa qatysty kezekti sot otyrysy ótýi tıis bolǵan. Biraq protsess keıinge shegerildi, dep habarlaıdy QazAqparat tilshisi.

«Advokattyń aýa raıynyń qolaısyzdyǵyna baılanysty sot otyrysyn keıinge qaldyrý týraly ótinishin eskere otyryp protsess keıinge aýystyryldy»,- dedi Jetisý oblystyq soty baspasóz qyzmetiniń ókili Nursultan Orynbasarov.

Almaty oblystyq polıtsııa departamentiniń eks-basshysy Serik Kúdebaevtyń ústinen eki qylmystyq is qozǵalǵan.

«Sottalýshyǵa Qylmystyq kodekstiń 146-babynyń 2-bóligi 1,3,4 tarmaqtary jáne 362-babynyń 4-bóligi boıynsha is qozǵalǵan. Bul - azaptaý jáne bılikti nemese laýazymdyq ókilettigin asyra paıdalaný faktileri»,- dedi Nursultan Orynbasarov.

Sot ókili Qylmystyq kodekstiń 362-baby 4 bóligi boıynsha 5 jyldan 10 jylǵa deıin bas bostandyǵynan aıyrý, al 146-baby 2-bóligi (3-7 tarmaqtary) boıynsha 3 jyldan 7 jylǵa deıin sottaý jáne úsh jylǵa deıin qandaı da laýazym atqarý quqyǵynan aıyrý qarastyrylǵanyn naqtylady.

Aıta keteıik, 5 qańtarda Taldyqorǵanda Almaty oblystyq polıtsııa departamentiniń burynǵy basshysy Serik Kúdebaevqa qatysty sot protsesi bastaldy.

Eske salsaq, Serik Kúdebaev qańtar oqıǵasy boıynsha kúdikti dep tanylǵan bolatyn.

Ol 2020 jyldan bastap 2022 jyldyń qańtaryna deıin Almaty oblysy polıtsııa departamentiniń bastyǵy qyzmetin atqarǵan.

2022 jyldyń 18 aqpanynda ishki ister organdarynan óz erkimen bosatyldy.