Taldyqorǵanda bir úıdiń úsh kelini ury bolyp shyqty
TALDYQORǴAN. QazAqparat - Taldyqorǵanda qalta urlyǵymen aınalysatyn úsh kelinniń bireýi tutqyndaldy. Qalǵan eki abysyn kúdiktiler tizimine ilinip, ázirshe bostandyqta júr, dep habarlaıdy QazAqparat tilshisi.
Jaqynda ǵana Taldyqorǵan qalasynyń ortalyq bazarynda kúdikti Elena Kozlovskaıanyń urlyq jasap jatqan sáti beınebaqylaý kamerasyna túsip qalǵan. Kóp uzamaı osy derek boıynsha zardap shekken azamat qalalyq ishki ister basqarmasyna aryzdandy. Tártip saqshylary izin sýytpaı kúdiktini qolǵa túsirdi. Sebebi azamatsha buǵan deıin de dál osy syndy qylmystary úshin isti bolǵan. Elena Kozlovskaıa bótenniń múlkin urlaý kezinde birneshe ret syrtqy keıipin ózgertken. Máselen, beınejazbanyń birine túsken sátte ol jasandy shash kıip jáne kıimin aýystyrǵan. Tergeýshiler Elenanyń jalǵyz emestigin anyqtady. Bir qyzyǵy onyń sybaılastary óziniń abysyndary bolyp shyqty. Úsheýi de aǵaıyndy syǵandardyń áıelderi.
«Elena Kozlovskaıa, Maksımova Evdokııa, Ahmetova Janar atty kelinder bári birge turady. Bulardyń barlyǵy da qalta urlyǵymen aınalysady. Qazirgi ýaqytta barlyq is sharalar júrgizilýde. Taldyqorǵan qalalyq ortalyq bazarynda jumys isteıtin satýshylarǵa, barlyqtaryna silteme taratylǵan», dedi Taldyqorǵan qalalyq ІІB bólim bastyǵy Ashat Arapov.
Olar Taldyqorǵan, Kóksý aýdany men Almaty qalasynyń qoǵamdyq oryndarynda uzaq ýaqyt boıy urlyq jasaǵan degen de aqparat bar. Tergeýshilerdiń sózinshe, qalta urylaryn ustaý ońaı, al qylmysyn dáleldeý qıyn. Óıtkeni kúágerler men beınejazba bolmasa olar qylmysty moıyndamaıdy eken.
