Taldyqorǵanda Beısen Quranbek atyndaǵy olımpıada ótti
TALDYQORǴAN. QazAqparat - Taldyqorǵanda belgili jýrnalıst Beısen Quranbek atyndaǵy ustazdar men oqýshylar arasynda oblystyq olımpıada ótti, dep habarlaıdy QazAqparat tilshisi.
Úsh kezeńnen turatyn aqtyq synǵa 16 ustaz, 18 oqýshy ótti. Muǵalimder Beısen Quranbek týraly esse, al oqýshylar maqala jazdy.
«Talantymen tanylǵan tulǵa» atty kezeńde beınerolıkter túsirip, jýrnalıst aıtyp ketken ulaǵatty sózderge taldaý jasady. «Jetisý daryny» oblystyq oqý-ádistemelik ortalyqtyń uıytqysymen ótken olımpıada maqsaty nebári 48 jyl ómir súrgen jýrnalıstiń ómiri men shyǵarmashylyǵyn nasıhattaý. Beısentaný iliminiń negizin qalap, bolashaq jýrnalısterge jol ashý. Jarys qortyndysymen ustazdar arasynda Tekeli qalasy №5 orta mektebiniń qazaq tili men ádebıeti pániniń muǵalimi Janzıla Isaeva bas júldege ıe boldy. Al oqýshylar arasynda birinshi oryn Kerbulaq aýdany, Kúreńbel orta mektebiniń 10 synyp oqýshysy Alýa Baıtileýova birinshi oryndy jeńip aldy. Jeńimpazdardy Beısen Quranbektiń týǵan kúni – 9 jeltoqsanda baǵaly syılyqtarmen marapattaý josparlanyp otyr.
«Bul olımpıada karantındik shekteýlerge baılanysty onlaın ótkizip otyrmyz. Bolashaqta bul olımpıadany oblystyq deńgeıde júıeli túrde uıymdastyramyz. Sonymen birge óńirlik jáne respýblıkalyq deńgeıge shyǵarýǵa josparlap otyrmyz», - deıdi «Jetisý daryny» oqý-ádistemelik ortalyǵynyń dırektory Álisher Basharov.
