Taldyqorǵanda benzın tapshy bolyp tur
TALDYQORǴAN. QazAqparat - Almaty oblysynyń ortalyǵy Taldyqorǵan qalasynda benzın tapshy. Al shahar boıynsha 28 janar-jaǵarmaı satatyn beket bolsa, onyń 25-inde benzın tek talonmen ǵana beriledi, dep habarlaıdy QazAqparat tilshisi.
Qazir Taldyqorǵan boıynsha tek «Gazpromneft» benzın quıý beketinde suıyq otyn esh kedergisiz satylýda. Qazir osy bekettiń aldynda uzyn-sonar kezek qalyptasqan. Taldyqorǵandyq Serik Bekishev búgin suıyq otyndy satyp alý úshin ol jerde eki saǵattan astam ýaqytyn joǵaltqanyn aıtady.
«Búgingi kúni elimizdegi Pavlodar janar-jaǵarmaı óńdeý zaýytynyń ýaqytsha jóndeýden ótýine baılanysty, qazir tek bizdiń qalamyzda ǵana emes barlyq oblystarda osyndaı jaǵdaı. Osyǵan baılanysty bizdiń Taldyqorǵanda da janar-jaǵarmaıǵa biraz tapshylyqtar bolyp jatyr. Búgingi kúni qalamyzda 28 janar-jaǵarmaı satý beketi tirkelgen. Onyń ishinde benzındi úzdiksiz satyp jatqan «Gazpromneft» beketi. Osy kásiporynnyń qalamyz boıynsha úsh núktesi bar. Ol jerlerde benzın esh kedergisiz satylýda. Al 25 bekette benzın talon arqyly berilip jatyr», - dedi Taldyqorǵan qalalyq kásipkerlik bóliminiń sektor meńgerýshisi Nurbol Qalıahmetov.
Halyq jappaı kezekke turǵan «Gazpromneft» beketinde AI 92 benzıni 156 teńgege, al AI 95 - 166 teńgege baǵalanǵan. Al Taldyqorǵan qalalyq kásipkerlik bólimindegiler benzın tapshylyǵy osy aptada sheshilip qalady degen úmitte.
