Taldyqorǵanda basyna gaz qubyry qulaǵan oqýshynyń mıy shaıqaldy
Zardap shekken qyzdyń anasy gaz qubyryn jasaǵandardy sotqa beremin dep otyr. Oqýshy Galına Lebedeva basyna aýyr gaz qubyry qulaǵanda esinen tanyp qalǵanyn aıtady. Oqıǵa úıiniń qorshaýynyń syrtynda bolǵan.
«Balamnyń mıy shaıqalǵan. Dáriger qyzyma tynyshtyq kerek dedi. Dárigerge qaralǵan barlyq qujattarymyz bar. Al erteń balamnyń densaýlyǵyna qubyrdyń qandaı saldary bolatynyn eshkim bilmeıdi. Qyzymnyń qan qysymy tómendep, basy aýyratyndy shyǵardy. Bizde Taldyqorǵanda balalar nevropatology joq eken. Aıyna biraq ret keledi maman. Qazir qyzymdy aqyly emhanaǵa qaratyp jatyrmyn», - dedi qyzdyń anasy Vıktorııa Lebedeva.
Zardap shekken qyzdyń anasy gaz qubyrlary óte sapasyz jasalǵan dep otyr. Olar turyp jatqan «Qazaqstan» kóshesindegi gaz qubyrlary qatty jel soqsa qulaýy múmkin dep qaýiptenýde.
Al, bul jumystardy ákimdik merdigerden byltyr qabyldap alǵan.
«Jumys qabyldanǵannan keıin belgili bir merzimge merdiger kepildeme beredi. Jumysta ketken kemshilikter qabyldaǵan kezde bilinbeýi múmkin. Biraq ýaqyt óte kele keıinnen shyǵyp jatady. Biz tekserý júrgizemiz. Ondaı kemshilikter bolsa merdiger qaıta qalpyna keltiredi. Al zardap shekken qyzdyń ata-anasyna merdiger mekemeniń ókilderi baryp sóılesti. Merdiger mekeme materıaldyq, moraldyq jaǵynan tolyqtaı kómegin tıgizedi. Oǵan biz baǵdarlamanyń ákimshisi retinde kepildik beremiz», - dedi Almaty oblystyq energetıka jáne TÚKSh basqarmasy bastyǵynyń orynbasary Damır Dáýlethan.
Aıta keteıik, jalpy Taldyqorǵandy gazdandyrýǵa 19 mlrd teńge bólingen. 2016 jyldan bastap qalany tórt kezeń boıynsha gazdandyrý júrip jatyr. Qazir sońǵy kezeńi aıaqtalýǵa jaqyn.
