Taldyqorǵanda bastyǵyn atyp óltirgen orynbasarǵa úkim shyqty
TALDYQORǴAN. QazAqparat - QR QK 101-babynyń 1-bóligimen aıyptalǵan Almaty oblysynyń qorǵanys isteri jónindegi departament bastyǵynyń eks-orynbasary, podpolkovnık Asqar Ospanov eki jylǵa bas bostandyǵynan aıyryldy, dep habarlaıdy QazAqparat tilshisi.
Sot anyqtaǵandaı, marqum bolǵan azamat óziniń orynbasaryn júıeli túrde jeke basyna til tıgizip, abyroıyn túsirgen. Jeke quram aldynda qorlaýy ádetke aınalǵanymen qatar, birneshe márte aqsha da talap etipti. Al uzaqqa sozylǵan osyndaı psıhıkany kúızeltetin ahýaldan keıin affekt jaǵdaıda Asqar Ospanov óziniń bastyǵyn ańshy myltyǵymen atyp óltirgen. ıAǵnı, kabınettiń ishinde Almaty oblysynyń qorǵanys isteri jónindegi departamentiniń bastyǵy bolǵan B.Berıstemovtiń keýde tusynan bir márte oq atqan. Jaraqat saldarynan polkovnık sol jerde qaıtys bolǵan.
«A. Ospanov QR QK 101-babynyń 1-bóligi, ıaǵnı affekt jaǵdaıynda kisi óltirý qylmysy boıynsha aıyptalyp, eki jylǵa bas bostandyǵynan aıyryldy. Kórsetilgen bap boıynsha úsh jylǵa deıingi merzimge bas bostandyǵyn shekteý nemese sol merzimge bas bostandyǵynan aıyrý jazasy qoldanylatynyn atap ótkim keledi», - dedi Taldyqorǵan garnızony áskerı sotynyń tóraǵasy Rınat Aqpar.
QR QK 52,53,54 baptarynyń talaptaryn eskere otyryp, Taldyqorǵan garnızony áskerı sotynyń úkimimen Asqar Ospanovqa 2 jylǵa bas bostandyǵynan aıyrý jazasy taǵaıyndaldy. Jazany qylmystyq atqarý-júıesiniń eń tómengi qaýipsizdik mekemesinde óteý belgilengen.
Jábirlenýshi ókiliniń azamattyq talaby jartylaı qanaǵattandyrylǵan.
A.Ospanovtan jábirlenýshiniń paıdasyna 2 510 000 teńge múliktik zalal jáne 500 000 teńge advokatqa jumsalǵan shyǵyndar óndirilgen. Sonymen qatar, ol jábirlenýshiniń paıdasyna 3 mln teńge moraldyq ótemaqy tóledi.
Esterińizge sala keteıik, qandy oqıǵa bıyl 31 naýryzda Taldyqorǵandaǵy Almaty oblystyq qorǵanys isteri jónindegi departamenttiń ǵımaratynda bolǵan. Kúdiktige qatysty sot 25 qyrkúıekte bastalǵan bolatyn.
