Taldyqorǵanda balabaqshalardyń 50 paıyzdan astamy - jekemenshik
TALDYQORǴAN.QazAqparat - Taldyqorǵanda qala kúni merekesi qarsańynda 125 oryndyq jekemenshik balabaqsha ashyldy, dep habarlaıdy QazAqparat tilshisi.
"Bizdiń eń basty baılyǵymyz - balalarymyz. Olar qýansa, biz de qýanyshtymyz. Jańa mekeme naǵyz baqyt mekeni bolsyn!", - dedi mekemeniń ashylý saltanatynda qala əkimi Baǵdat Qarasaev.
Shahar basshysy atap ótkendeı, qalada 3-6 jastaǵy balalardyń 92,5 % mektepke deıingi bilimmen qamtylǵan. Jyl aıaǵyna deıin bul kórsetkishti 94-95% jetkizý kózdelgen.
Jańadan ashylǵan balabaqshanyń aqysy aıyna 19 myń teńgeni quraıdy. Mekeme meńgerýshisi Zúlfııa Valıshanovanyń aıtýynsha, bul somanyń ishine tórt mezgil ystyq tamaq, sondaı-aq ən-bı úıirmesi men til kýrsynyń aqysy kiredi.
Jalpy, Taldyqorǵanda 61 balabaqsha bar. Onyń 37-si jekemenshik.
Aıta ketý kerek, Taldyqorǵanda qala kúnine arnalǵan merekelik sharalar 8 qyrkúıekten bastaldy. Túrli shyǵarmashylyq baıqaýlar, sheberlik sabaqtar, retro kontsertter men sporttyq saıystar, tanymal tulǵalarmen kezdesýler, áleýmettik nysandardyń ashylýy, kásiporyndardyń tusaýkeserleri sekildi kóptegen sharalar bıylǵy merekeniń sánin kirgizetin bolady. Al, negizgi mereke 30 qyrkúıek kúni saǵat 10:00-de qalanyń ortalyǵynan bastalyp, Jastar sport saraıy mańyndaǵy alańda jáne «Jastar» saıabaǵynda jalǵasady.
