Taldyqorǵanda avtobýs aıaldamasyn qıratqan buzaqylar ustaldy
TALDYQORǴAN.QazAqparat - Taldyqorǵanda avtobýs aıaldamasyn qıratqan buzaqylar ustaldy. Úsh jigit aıaldamanyń áınegin taspen uryp qıratqan, dep habarlaıdy QazAqparat tilshisi.
«Óz kinámdi tolyǵymen moıyndaımyn. Ne úshin mundaı áreketke barǵanymdy ózim de bilmeımin. Qatty ókinemin. Taldyqorǵandyqtardan keshirim suraımyn», -dedi Eldar Gamaýtdınov.
Olardyń bul áreketin sol jerden ótip bara jatqan patrýldik polıtsııa qyzmetkerleri kórip qalǵan. Tártip saqshylarynyń kóligin kórgen úsheý qashyp ketpek bolǵan. Alaıda polıtsııa olardy alysqa uzatpaı ustap alǵan.
«Qazirgi tańda shyǵyn kólemi eseptelip jatyr. Soǵan baılanysty istiń qandaı túrge jatatynyn anyqtaımyz. Ákimshilik nemese qylmystyq jaýapkershilikke tartylady», - dedi Taldyqorǵan qalalyq ІІB ýchaskelik ınspektory Ámir Kópbosynov.
Anyqtalǵandaı, vandaldardyń ekeýi Alakól aýdanynyń turǵyny. Taǵy bireýi Almaty qalasynan qydyryp qonaqqa kelgen. 6-shaǵyn aýdandaǵy aıaldamany búldirgen jastar qurylys fırmasynyń jumysshylary. Olardyń mundaı áreketine qarttar qatty qapaly. Sondyqtan qala turǵyndary ýaqytsha ustaý mekemesine arnaıy izdep baryp vandaldardyń áreketin synǵa aldy. Al buzaqylar jasaǵan isterine qatty ókinetinin aıtyp, keshirim suraýmen boldy.
