Taldyqorǵanda aýrýhana esepshisi 109 mln teńgeni býkmekerlik keńsege salyp jibergen
Sot anyqtaǵandaı, Taldyqorǵandaǵy oblystyq balalar aýrýhanasynyń esepshisi 2021 jyldyń 1 naýryzynda esepshi bolyp jumysqa ornalasqan. Sol ýaqyttan bastap memlekettiń bıýdjet qarajatyn óziniń jeke shotyna aýdaryp otyrǵan.
«Keltirilgen múliktik zalal kólemi 109 mıllıon teńgeden asady. Prokýror sottalýshyny qarjy uıymdarynda basshylyq qyzmetterdi atqarý quqyǵynan ómir boıyna shektep, 8 jyl merzimge bas bostandyǵynan aıyrý jazasyn taǵaıyndaýdy surady. Sottalýshy óz kinásin tolyq moıyndap, shyn kóńilden ókinip, uıymǵa keltirilgen zalaldy óteýge mindettenip, sottan qatań jaza qoldanbaýyn surady.
Kinásin moıyndaýyn jáne jasaǵan isine ókinýin, sottalýshyda kámeletke tolmaǵan balasynyń bolýyn, jastyǵyn, sonymen qatar sottalýshynyń keltirilgen zalaldy ishinara ótegendigin, aýyrlatatyn mán-jaılardyń bolmaýyn eskere otyryp, sot A.-ǵa memlekettik qyzmette, jergilikti ózin-ózi basqarý organdarynda tıisti laýazymdardy atqarý quqyǵynan ómir boıyna aıyra otyryp, 5 jyl merzimge bas bostandyǵynan aıyrý jazasyn taǵaıyndady», -delingen Jetisý oblystyq sotynyń baspasóz qyzmetiniń habarlamasynda.
Sottalýshy jazany qylmystyq – atqarý júıesiniń ortasha qaýipsiz mekemesinde óteıdi.
Aıta keteıik, Taldyqorǵan qalalyq sotynda senip tapsyrylǵan bóten múlikti ıelenip alý nemese ysyrap etý faktisi boıynsha oblystyq «Balalar aýrýhanasy» MKK-niń esepshisine qatysty qylmystyq is QR QK-niń 189-baby, 4-bóligi, 2-tarmaǵy boıynsha qaraldy.
