Taldyqorǵanda áýejaı qoımasyndaǵy órtte qurban bolǵan azamatqa batyr ataǵy berilýi kerek - marqumnyń anasy
TALDYQORǴAN. QazAqparat - Taldyqorǵan áýejaıynyń qoımasyndaǵy órtten qurban bolǵan azamatqa batyr ataǵy berilýi kerek. Óıtkeni, olar óz ómirlerin qaterge tigip, úlken apattyń aldyn aldy. Órt saldarynan qaza tapqan marqum Rahat Kámetaevtyń týystary osy máseleni kóterdi, dep habarlaıdy «QazAqparat» tilshisi.
Eske sala keteıik, ótken beısenbide Taldyqorǵandaǵy áýejaı qoımasynda bolǵan órtten bir adam qaza taýyp, ekinshisi aýrýhanada jatyr. Qazir denesiniń 87 paıyzyn kúıik shalǵan azamattyń ómirine arasha túsý úshin Almatydan arnaıy dárigerler shaqyrylǵan. Al marqum Rahat Kámetaevtyń anasy ulynyń erlikpen qaza tapqanyn aıtýda. «Eger Rahat der kezinde sheshim qabyldamaǵanda, 600 tonna kerosın saqtalǵan tsısternalar jarylyp, búkil áýejaı otqa oranatyn edi», - deıdi marqumnyń týystary. 
Rasynda, órt áýejaıdaǵy janar-jaǵarmaı qoımasynda bolǵan. Janarmaı quıatyn kólik jáne sorǵy stansasy otqa oranyp, sol jerde ishinde birneshe tonnalyq janarmaı saqtalǵan alyp tsısternalar turǵan eken. Al eger ony órt sharpysa jaǵdaıdy tipten kózge elestetýdiń ózi qıyn. Sondyqtan Rahat Kámetaev pen Rústem Musabekovtiń kózsiz erligin áýejaıdyń prezıdenti de moıyndap otyr.
«Óte batyr jigitter. Ózderiniń kúshimen krandardy, ar jaǵynan keletin kerosınniń, qubyr symdaryn bárin jaýyp tastady. Sonyń arqasynda úlken jarylys bolmady dep oılaımyn. Rasynda, olarǵa óz bastaryn arashalap qashyp ketýlerine de bolatyn edi. Qashyp ketse, onda janarmaı saqtalǵan 600-ge jýyq tonna kerasın jarylyp, arty ne bolatynyn kózge elestetýdiń ózi sumdyq edi», - deıdi «Jetisý» AQ avıakompanııasynyń prezıdenti Qalmuhanbet Dóńsebaev. Al Rahat Kámetaev pen Rústem Musabekov óz ómirlerin qaterge tigip, memlekettiń 3-4 mlrd teńge jýyq múlkin saqtap qalǵan.
Aıta keteıik, órt saldarynan marqum bolǵan Rahat Kámetaevtyń artynda úsh balasy jáne jary qaldy. Al órtten denesiniń 87 paıyzy kúıgen Rústem Musabekovtyń jaǵdaıy óte aýyr. Naýqas 4 kúnnen beri jansaqtaý bóliminde es-tússiz jatyr.
Qazirgi kúni áýejaıdaǵy janar-jaǵarmaı qoımasynda bolǵan órttiń sebebi anyqtalyp jatyr. «Zardap shekken jáne qaza bolǵan azamattyń otbasylaryna ótemaqy beriledi», - deıdi áýejaı basshysy.
Eske sala ketsek, 1979 jylǵy Rústem Musabekov janar-jaǵarmaı tehnıgi al, 1973 jylǵy Rahat Kámetaev áýe qaýipsizdigi qyzmetiniń ınspektory bolyp jumys istegen.
