Taldyqorǵanda «Astana Arlans» klýby Ózbekstan boksshylarymen kúsh synasýda
TALDYQORǴAN. QazAqparat - Osy ýaqytta «Astana Arlans» kásipqoı boks klýby Taldyqorǵanda ótip jatqan match barysynda Ózbekstan eliniń «Uzbek Tigers» komandasymen kúsh synasýda, dep habarlaıdy QazAqparat.
Buǵan deıin «arlandar» - Oljas Sáttibaev (52 keli), Zakır Safıýllın (60 keli) men Aslanbek Shymbergenov óz qarsylastaryn jeńgen bolsa, jana ǵana aıaqtalǵan jekpe-jekte otandasymyz Nurdáýlet Jarmanov Bektemır Melıkýzıevten utylyp qaldy.
Nurdáýlet Jarmanov 81 keli salmaqta kúsh synasty. Áýesqoı boksta júrip 2013 jyly Qazaqstan chempıony ataǵyna qol jetkizgen. Ýnıversıada oıyndarynyń qola júldegeri atanǵan.
Onyń qarsylasy 2015 jylǵy Azııa chempıony. Bektemır Melıkýzıev sol jyly álem chempıonatynda da kúmis medaldi moınyna taqty. Byltyr Rıo Olımpıadasynda fınalǵa deıin jetip, nátıjesinde kúmis júldeni qanaǵat tutty. Ol 75 keli salmaq dárejesinde óner kórsetti. WSB jobasynda bir jekpe-jek ótkizgen. Byltyr sáýir aıynda reseılik Aleksandr Agafonovqa qarsy oınap, utylyp qalǵan bolatyn.
Qazir asa aýyr salmaqtaǵy alyptardyń aıqasy ótýde. Bul keshte jankúıerler «arlandar» sapynan Qamshybek Qunqabaev (+91 keli) pen ózbek komandasynan Bahodyr Jalolovtiń ónerin tamashalaýda.
Aıta keteıik, osyǵan deıingi 3 jekpe-jektiń barlyǵy da «Astana Arlans»-tyń jeńisimen aıaqtalǵandyqtan, otandyq boksshylar bul kezdesýde aldyn ala jeńiske jetip otyr.
