Taldyqorǵanda áskerı qolbasshy Ivan Panfılovqa bıýst ornatyldy

NUR-SULTAN. QazAqparat – Taldyqorǵan garnızonynyń desanttyq-shabýyldaý quramasynda Keńes Odaǵynyń Batyry general-maıor Ivan Panfılovtyń bıýsti ornatyldy, dep habarlaıdy QazAqparat Qorǵanys mınıstrliginiń saıtyna silteme jasap.

«Qazaqstan áskerı qyzmetshileriniń birneshe býyny úshin Ivan Vasılevıch Panfılov ańyzǵa aınalǵan, janqııar erliktiń jáne Otanyn sheksiz súıgen perzenttiń úlgisi bolyp qala beredi», - dedi Qorǵanys mınıstriniń orynbasary, general-maıor Muhamedjan Talasov bıýsttiń ashylý saltanatynda.

Sharaǵa Reseıdiń Máskeý oblysy Volokalamsk qalalyq okrýginiń basshysy Mıhaıl Sylka, Jetisý oblysy men Taldyqorǵan qalasy ákimdiginiń ókilderi, áskerı bólimderdiń komandırleri, Qarýly kúshter men Aýǵan soǵysynyń ardagerleri qatysty.

«Almaty oblysynyń aýmaǵynda ornalasqan desanttyq-shabýyldaý quramasy Ivan Panfılov esimimen atalady. Dál osy jerde 1941 jyldyń jazynda el aýzynda «panfılovshylar» dep atalyp ketken 316-atqyshtar dıvızııasy quryldy. Búgingi kún – tarıhı kún. Qorǵanys mınıstrligine jáne bıýst jasaýǵa atsalysqan barshaǵa azamattarǵa alǵys aıtamyn», - dedi batyrdyń nemeresi, Memlekettik áskerı-tarıhı mýzeıdiń Almaty fılıaly basshysy Alýa Baıqadamova.

Saltanatty rásimge qatysýshylar Ivan Panfılovtyń bıýstine gúl shoqtaryn qoıyp, batyrdyń rýhyna taǵzym etti.

Foto: www.gov.kz