Taldyqorǵanda ardager sportshylar boz kilemde beldesti
TALDYQORǴAN. QazAqparat - Taldyqorǵanda qala kúni merekesine oraı ardager sportshylar arasynda qazaq kúresinen «Arlandar aıqasy» týrnıri ótti. Qala ákiminiń júldesi sarapqa salynǵan básekege oblystyń túpkir-túpkirinen 10 komanda, 30-ǵa tarta balýan qatysty. Jarys 45-50 jas, 51-55 jas jáne 56 jastan joǵary sportshylar arasynda uıymdastyryldy, dep habarlaıdy QazAqparat tilshisi.
«Shara maqsaty - ultymyzdyń sportyn órkendetý», - deıdi qalalyq sport jáne dene shynyqtyrý bóliminiń basshysy Ádilet Rymtaıuly. Onyń aıtýynsha, bıyl kóktemde osy qazaq kúresinen jasóspirimder arasynda «Bóltirikter beldesýi» atty báseke uıymdastyrylǵan. Eresekter arasynda «Taldyqorǵan bórisi» týrnıri ótti.
Jalpy, jarys asa tartysty ótti. Balýandar boz kilemge shyqqan bette bir-birinen aılasyn asyrýǵa árekettendi. Bul rette asa belsendi bolǵan Alakól aýdanynyń sportshylaryn atap ótken jón. Jarys qorytyndysyna sáıkes, 50 jasqa deıingi balýandar arasynda 90 kelige deıin salmaq dárejesinde birinshi oryndy taldyqorǵandyq Jubanyshbaev Talǵat jeńip alsa, 90 keliden joǵary salmaqta bas báıgeni alakóldik Omarov Serikjan qanjyǵasyna baılady.
55 jasqa deıingi balýandar arasynda 90 kelige deıingi salmaqta kóksýlyq Nurlan Dárýbaev top jarsa, 90 keliden joǵary kategorııada Baqnur Shaıahmetov jeńimpaz atandy. Al 56 jastan joǵary ardagerler arasynda 90 kelige deıingi salmaqta jeńimpaz bolyp kóksýlyq balýan Seıit Dáýitov tanylsa, odan joǵary salmaqta taldyqorǵandyq Saıathan Qudaıbergenov jeńimpaz atandy.
Aıta ketý kerek, Taldyqorǵanda qala kúnine arnalǵan merekelik sharalar 8 qyrkúıekten bastaldy. Túrli shyǵarmashylyq baıqaýlar, sheberlik sabaqtary, retro kontsertter men sporttyq saıystar, tanymal tulǵalarmen kezdesýler, áleýmettik nysandardyń ashylýy, kásiporyndardyń tusaýkeserleri sekildi kóptegen sharalar bıylǵy merekeniń sánin kirgizetin bolady. Al, negizgi mereke 30 qyrkúıekte saǵat 10:00-de qalanyń ortalyǵynan bastalyp, Jastar sport saraıynyń mańy men «Jastar» saıabaǵynda jalǵasady.
