Taldyqorǵanda ár salanyń eń úzdik mamany anyqtaldy
TALDYQORǴAN. QazAqparat - Taldyqorǵanda qala kúnine oraı uıymdastyrylǵan «Eń úzdik, eń úlgili» atty baıqaýdyń jeńimpazdary anyqtaldy. Búgin olar qalyń kópshiliktiń aldynda qurmetke bólenip, marapattaldy, dep habarlaıdy QazAqparat tilshisi.
«Eń úzdik múǵalim» nomınatsııasynda Taldyqorǵan qalasyna qarasty Erkin aýylyndaǵy E. Berliqojauly atyndaǵy № 11 orta mekteptiń ustazy top jardy. 57 jastaǵy Baqytjan Súleımenova joǵary sanattaǵy bastaýysh synyp muǵalimi. Al «Eń úzdik dáriger» atalymy Taldyqorǵan qalalyq emhanasynyń akýsher-gınekology Janat Júnishanovaǵa buıyrdy. «Eń úzdik ýchaskelik ınspektor» nomınatsııasyn 1991 jylǵy Mıras Asqarov jeńip aldy. Ol №6 ýchaskelik pýnktiniń polıtsııa kapıtany. Sondaı aq, «Eń úzdik aýla kútýshi» bolyp Ashat Abdrahmanov, qoǵamdyq kólik júrgizýshilerdiń ishinen Álibek Ábildaev jeńimpaz atandy. Jalpy baıqaýǵa qatysýshylar bas-aıaǵy 9 nomınatsııa boıynsha synǵa tústi. 
Aıta keteıik, búgin taldyqorǵandyqtar qala kúnin toılap jatyr. Shahar kúnine arnalǵan merekelik sharalar 8 qyrkúıekten bastaldy. Túrli shyǵarmashylyq baıqaýlar, sheberlik sabaqtar, retro kontsertter men sporttyq saıystar, tanymal tulǵalarmen kezdesýler, áleýmettik nysandardyń ashylýy syndy kóptegen sharalar bıylǵy merekeniń sánin kirgizdi.
