Taldyqorǵanda Almaty oblysynyń aktıvi Elbasy maqalasyn talqylady
Óńir basshysy Prezıdenttiń baǵdarlamalyq maqalasy sońǵy kúnderde el ómirindegi qoǵamdyq-saıası mańyzy zor oqıǵanyń biri bolǵanyn erekshe atap ótti. Onda Elbasy ekonomıkalyq jáne saıası jetistikterimizdi damytý jolynda rýhanı qorymyzdy barynsha baıytatyn kóp salaly jańa baǵdarlamasyn usynyp otyrǵanyna toqtaldy.
- El Prezıdenti qoǵamnyń rýhanı jańǵyrýyna halyqtyń dástúri men ulttyq mádenıeti negiz bolýy tıis ekenin aıtty. Mundaı baǵytty ustaný keshegi kún men búgindi, búgin men erteńdi jalǵastyrady. Sondyqtan bizdiń mindetimiz Memleket basshysynyń tapsyrmasyn oryndaı otyryp, maqalada kórsetilgen jobalarǵa basty nazar aýdarý, - dep atap ótti A. Batalov. Basqosýda fılosofııa ǵylymdarynyń doktory, professor, «Máńgilik el» ǵylymı-bilim berý ortalyǵynyń jetekshi ǵylymı qyzmetkeri Amanjol Qasabek, «Almaty oblystyq slavıan qozǵalysy» qoǵamdyq birlestiginiń múshesi Natalıa Belık, oblystyq «Jetisý» jáne «Ognı Alataý» gazetteriniń bas redaktorlary Ámire Árin men Atsalım Idıgov, Óńirlik kommýnıkatsııalar qyzmetiniń jýrnalıst-moderatory Galına Mıtkovskıh shyǵyp, óz oı-pikirlerin bildirdi. Úshtildilik saıasat, latyn álipbıine kóshý, qazaqstandyq biregeılik týraly sóz qozǵaǵan spıkerler Prezıdenttiń bul rýhanı jańarý bastamalaryna bir kisideı atsalysý qajettigin alǵa tartty. Aktıv otyrysyn túıindegen oblys ákimi A. Batalov:
- Qoǵamdyq sanany jańǵyrý jónindegi Elbasy Nursultan Ábishuly Nazarbaevtyń ıdeıasy - elimizdegi konstıtýttsııalyq, ekonomıkalyq reformalardyń zańdy jalǵasy. Maqalada jańa zaman kóshine ilesip, órkenıetti el bolý úshin ulttyq sanany saqtaý men óristetýdiń naqty joldary usynylǵan. Osy baǵdarlamalyq qujatqa sáıkes Jetisý óńirinde birlik pen tatýlyqty, rýhanı kelisimdi, ekonomıkalyq damý úrdisterin saqtaý maqsatynda atqarylatyn naqty jumystar 1 mamyrǵa deıin aıqyndalýy tıis, - dep tıisti qurylymdarǵa naqty mindetter júktedi.
Sondaı-aq oblys basshysy árbir aýdan, qalalardaǵy tarıhı, mádenı eskertkishterdiń tizimin jańartýdy, jastardy eljandylyqqa tárbıeleý isin kúsheıtýdi, halyqtyń rýhanı jáne moraldyq qundylyqtaryn nyǵaıtý baǵytyndaǵy jumystardy shıratýdy tapsyrdy.
