Taldyqorǵanda alǵash ret júrektiń qalqanshasyna jabyq ádispen operatsııa jasaldy
TALDYQORǴAN. QazAqparat - Taldyqorǵanda alǵash ret júrek qalqanshasynyń týa bitken aqaýyna jabyq ádispen biteý otasy jasaldy. Ádette mundaı kúrdeli operatsııa ashyq ádispen oryndalady, dep habarlaıdy QazAqparat tilshisi.
Taldyqorǵan qalasyndaǵy Almaty oblystyq kardıologııa ortalyǵynda okklıýder arqyly júrek qalqanshasyndaǵy sańylaýdy transkateterli jabý ádisi boıynsha sheberlik saǵaty ótti. Jetisýlyq áriptesterimen tájirıbe bólisýge Pedıatrııa jáne balalar hırýrgııasy ǵylymı ortalyǵynyń rentgenohırýrgy Azız Onlasynov keldi. Maman eki naýqasqa ota jasap, jańa ádistiń múmkindikteriniń áldeqaıda utymdy ekenin kórsetti. Dárigerdiń aıtýynsha, qalypty jaǵdaıda mundaı operatsııalar óte uzaq jáne kúrdeli túrde jasalady. «Eń aldymen naýqas jalpy narkoz arqyly uıyqtatylady. Onyń keýde qýysy ashylyp, júrektiń jumysy ýaqytsha toqtatylyp sodan keıin biraq sańylaýdy tigý arqyly jamaıtynbyz. Al okklıýdermen tamyr arqyly júrek qalqanshasynyń sańylaýyn biteý áldeqaıda jyldam», - deıdi Azız Onlasynov.
Mundaı ádisten keıin naýqas birden ońalyp, qalypty ómirine tez oralady. Almaty jáne Astana qalalarynda operatsııanyń bul túri turaqty jasalyp keledi.
«Qazir mamandar ábden mashyqtanyp, óńirlerdegi áriptesterin úıretýde»,- deıdi kardıologııa ortalyǵynyń bas dárigeri Rahymberdi Sultanbekov. Jetisý óńiri bas kardıologynyń aıtýynsha, ortalyqta bir jylda 200-den astam ota jasalady. Onyń 25 paıyzy týa bitken júrek aqaýlary.
