Taldyqorǵanda alǵash ret ulttyq kıimder baıqaýy ótti
TALDYQORǴAN. QazAqparat – Taldyqorǵanda «Rýhanı jańǵyrý» baǵdarlamasy aıasynda «Úkili serýen» atty ulttyq kıimder baıqaýy ótti. Birinshi ret uıymdastyrylyp otyrǵan saıysqa Almaty oblysynda ulttyq kıim tigetin sheberler qatysty, dep habarlaıdy QazAqparat tilshisi.
Almaty oblystyq mádenıet basqarmasy qolǵa alǵan sharada tiginshiler ulttyq naqyshtaǵy úzdik kıimderin jurt nazaryna usyndy. Mundaǵy basty maqsat óńir turǵyndaryna ulttyq kıimderdi keńinen nasıhattap, kúndelikti kıip júrýge shaqyrý.
Balalar kostıýmderi, ánshiler men bıshilerge arnalǵan kóılekter men kamzoldar, beshpetter men sporttyq jeńil kıimniń bárinde qazaqtyń oıýy men órnegi bar. Baıqaýdyń alǵashqy kezeńinde 10 saýsaǵynan bal tamǵan ismer jandar aýdandyq deńgeıde sheberligin synady.
Mádenıet basqarmasynyń basshysy Márlen Kólbaev baıqaýdy dástúrli etip jáne onyń aýqymyn keńeıtýdi josparlap otyr.
«Bıylǵy jyly oblys kóleminde ótse, kelesi jly osy baıqaýdy Rýhanı jańǵyrý baǵdarlamasy aıasynda respýblıka kóleminde ótkizsek dep josparlap otyrmyz. Eger qoldaý tabylatyn bolsa biz respýblıka kóleminde ótkizemiz», - deıdi basqarma basshysy.
