Taldyqorǵanda «Aq jol» demokratııalyq partııasynyń konferentsııasy ótti

TALDYQORǴAN. QazAqparat - Taldyqorǵanda «Aq jol» demokratııalyq partııasynyń kezekten tys konferentsııasy ótti. Onda saıası uıymnyń saılaý aldy baǵdarlamasy tanystyrylyp, quryltaı delegattary saılandy, dep habarlaıdy QazAqparat tilshisi.

Partııa tóraǵasy Azat Perýashev óz sózinde aldaǵy Parlament saılaýyna jańa saıası baǵdarlama usynylyp otyrǵandyǵyn aıtty. Dóńgelek ústel barysynda osy baǵdarlamanyń jobasy pysyqtaldy. Alty baǵyttan turatyn qujat táýelsizdik jáne alash ıdeıasy, demokratııa men parlamentarızm syndy taqyryptardy qamtyp, barlyq deńgeıdegi ákimderdi saılaý sııaqty máselelerdi kóterip otyr. Sondaı-aq baǵdarlamada sybaılas jemqorlyqpen kúreske erekshe mán berilgen. Atap aıtqanda, jemqorlyqpen isti bolǵan azamattardyń bostandyqqa shyqqannan keıin shet el asyp ketýine múmkindik bermeý.

«Aq jol» partııasy syrtqy saıasattan da tys qalmaq emes. «Biz bul jerde memleketimizdiń turaqtylyǵyna, elimizdiń myqtylyǵyna barshamyz erekshe múddeli bolýymyz kerek dep bilemiz. Jáne de qandaı da bir ózgerister josparly ári memleketimizdiń múddesine saı bolý kerek», - dedi Azat Perýashev.