Taldyqorǵanda adasyp ketken 83 jastaǵy keıýana tabyldy
TALDYQORǴAN. QazAqparat - Taldyqorǵandyq polıtseıler adasyp ketken 83 jastaǵy qarııany izdep tapty, dep habarlaıdy QazAqparat tilshisi.
Almaty oblystyq polıtsııa departamenti baspasóz qyzmetiniń málimetinshe, búgin saǵat 14:00 shamasynda Taldyqorǵan qalasy polıtsııa basqarmasynyń kezekshi bólimine jergilikti turǵyndar habarlasqan.
Olar qalanyń 5-shaǵynaýdanynda turatyn 83 jastaǵy ájeniń tańerteń úıinen shyǵyp, qaıta oralmaǵanyna alańdaǵan.
Joǵalǵan keıýananyń kıgen kıimi men túr-túsi týraly habarlamany Taldyqorǵan qalasy PB patrýldik polıtsııa rotasynyń № 162 borty qabyldady.
Tártip saqshylary shuǵyl túrde jaqyn mańda ornalasqan turǵyn úı keshenderiniń aýlasy men kóshelerdi aralaýǵa kirisken.
Úsh saǵat ishinde polıtseıler kórshi shaǵynaýdanmen shektesetin tustan adasyp ketken qarııany tapty. Tártip saqshylary ájeıdi úıine jetkizdi.
Anasynyń aman-esen tabylǵanyna qýanǵan qyzy tártip saqshylaryna sheksiz alǵysyn jetkizdi.
