Taldyqorǵanda 7 sýburqaq iske qosyldy
TALDYQORǴAN. QazAqparat - Taldyqorǵan qalasynyń ortalyq alańynda jeti sýburqaq iske qosyldy. Sýburqaqtyń bári de mýzyka yrǵaǵymen bılep, túrli-tústi jaryqtarmen bezendirilgen, dep habarlaıdy QazAqparat tilshisi.
Jetisýdyń jeti ózenin órnektegen sýburqaqtyń ashylýyna Almaty oblysynyń ákimi Amandyq Batalov qatysty. Óńir basshysynyń aıtýynsha bul nysandar ortalyq alańnyń ajaryn ashyp qana qoımaı, halyqtyń serýen quryp, jazdyń aptap ystyǵynda tynyǵatyn jerge aınalmaq.
Sýburqaqtardyń sáýlettik bezendirilýi de erekshe. Birinde sý aspanǵa atqylasa, endi birinde dáliz ispettes, doǵa túrinde aǵady. Ashylý saltanatyna kelgen turǵyndar men qala qonaqtary sý dáliziniń astymen júrip, balasha qýandy.
Sýburqaqtardyń saltanatty ashylýyna qazaq estradasynyń jarqyn juldyzdary men Almaty oblystyq fılarmonııa ánshileri kelip, Taldyqorǵan tórin jyrǵa bóledi. Merekelik shara otshashýǵa ulasty.
