Taldyqorǵanda 5 myńnan asa jer ýchaskesin bireýler zańsyz ıemdenip alǵan
Qazir jer telimderin óz betinshe ıemdengenderdiń tizimi jasalyp, olarǵa eskertý hattamasy berilip jatyr.
Eskertýdi elemeı, jerdiń qujatyn jasamaǵan iri kásipkerlerge 2 mln teńgeden asa aıyppul salynady.
«Úsh aı merzimde Taldyqorǵan qalasyndaǵy Halyqqa qyzmet kórsetý ortalyǵyna júginý arqyly jerlerin zańdastyrýǵa múmkindik bar. Jerlerin zańdastyrmasa, jeke tulǵaǵa 75 AEK, iri kásipkerlerge 700 AEK kóleminde aıyppul salynady», - dedi «Azamattarǵa arnalǵan úkimet» MK AQ Jetisý oblysy boıynsha fılıaly dırektorynyń orynbasary Bekzat Tastanbaev.
Al bes jarym myńnan asa jerdiń qujaty joq ekenin mamandar arnaıy aeroǵarysh zertteýi arqyly anyqtaǵan.
Qarapaıym mysal retinde aıtatyn bolsaq, qujaty rásimdelmegen jerge úı turǵyzylǵan nemese kásipkerlik nysan salynǵan.
Osylaısha bir ǵana Taldyqorǵannyń ózinde 5568 jer ýchaskesiniń qujaty bolyp shyqqan.
Mamandar, eskertý hattamasyn alǵan jandar Halyqqa qyzmet kórsetý ortalyǵyna kelip, tez arada qujattaryn rásimdeý kerektigin eskertedi.
Eger qujattardy rásimdemese aıyppul salynady. Sebebi, bul jerlerdiń barlyǵy - memleket menshiginde turǵan jer telimderi.
Eń az degen aıyppuldyń kólemi jeke tulǵaǵa 230 myń teńge, jeke kásipkerge 306 myń, al ortasha kásip ıesi 500 myń teńgege deıin aıyppul arqalaıdy.
«Ártúrli jaǵdaı bolýy múmkin. Mysaly ol jer kezinde bul kisilerge bes jyl ýaqytqa ýaqytsha merzimge berilgen bolýy múmkin. Ýaqyttyń merzimi ótkennen keıin sol jerdi paıdalanyp otyrǵan adamdar, jer qatynastary bólimine júgine otyryp, qaıtadan uzartýǵa quqyqtary bar»,- dedi Jetisý oblysyndaǵy jer resýrstaryn basqarý departamenti basshysynyń orynbasary Erkebulan Mádibaev.
