Taldyqorǵanda 45 jastaǵy er adamdy atqan jergilikti turǵyn ustaldy
TALDYQORǴAN.QazAqparat - Taldyqorǵanda 45 jastaǵy er adamdy travmatıkalyq qarýmen oq atqan 42 jastaǵy jergilikti turǵyn ustaldy. Al jábirlenýshi aýrýhanaǵa jetkizildi, dep habarlaıdy QazAqparat tilshisi.
Oqıǵa 31 qazan kúni túnde Taldyqorǵandaǵy úshinshi yqsham aýdanyndaǵy dámhananyń janynda bolǵan. Dál osy jerden jábirlenýshi aýrýhanaǵa jetkizilgen. Jedel-izdestirý shara barysynda 42 jastaǵy turǵyn ustalyp, qamaýǵa alyndy.
Anyqtalǵandaı, kúdikti sol mańdaǵy kópqabatty turǵyn úılerdiń birinde turady. Ustalǵan sátte onyń ishimdik ishkeni belgili boldy. Oqıǵa bolǵan sátte eki azamattyń arasynda janjal týyndap, sońynda 42 jastaǵy turǵyn úıinen travmatıkalyq qarý alyp shyǵyp, qarsylasyna oq atqan.
«Gazben atylatyn travmatıkalyq tapansha aıǵaq zat tárkilendi. Kúdiktiniń aıtýynsha, ol bul tapanshany qoqys jáshiginen taýyp alyp, úıinde saqtaǵan. Qazir atalǵan faktige oraı QR QK 293-babynyń 3-tarmaǵy boıynsha sot-aldy tergeý júrip jatyr. Qajetti saraptamalar taǵaıyndalǵan», - dep málimdedi Almaty oblystyq Polıtsııa Departamentiniń baspasóz qyzmetinen.
