Taldyqorǵanda 400-ge jýyq sheteldik tirkeýdegi kólik zańdastyryldy
Zańdastyrylatyn avtokólik Qazaqstan aýmaǵyna 2022 jyldyń 1 qyrkúıegine deıin engen bolýy tıis. Kólik elimizdiń aýmaǵyna óter aldynda tirkeýden shyǵarylyp, salyq jáne basqa da tólemderi tólengen bolýy qajet. Eger kólik osy sharttarǵa sáıkes bolsa, rásimdeý quny 200 myń teńgeni quraıdy. Jalpy, kólikti zańdastyrý osy jyldyń 1 shildesine deıin jalǵasady. Azamattar mamandandyrylǵan HQO kelip te, mobıldi qosymshalar arqyly da ótinish bere alady.
«Osy ýaqytqa deıin 1,5 myńnan asa kólikti zańdastyrýǵa ótinish túsken. Olar boıynsha 367 kólik quraly tirkeldi. Zańdastyrýdan bas tartylǵan ótinishterdiń deni kedendik tazartýdan ótpegen, ózge memlekette esepten shyǵaylrmaýyna baılanysty bolyp keledi. Osy jaıttarǵa oraı zańdastyrý júrgizilmeıdi», - dedi Taldyqorǵan qalasyndaǵy Mamandandyrylǵan Halyqqa qyzmet kórsetý ortalyǵy bóliminiń jetekshisi Sovetbek Bolathanov.
Aıta keteıik, elimizde 23 qańtardan búginge deıin 70 myńǵa jýyq sheteldik nómirli kólik zańdastyrylypty. Onyń 67 paıyzy - Reseıden, taǵy 19 paıyzy - Armenııadan, 10 paıyzy - Qyrǵyzstannan, 2 paıyzy Grýzııadan jetkizilgen.
