Taldyqorǵanda 4-shi qabattan sekirgen sheneýniktiń uly eksklıýzıvti suhbat berdi
TALDYQORǴAN. QazAqparat - Taldyqorǵanda Sybaılas jemqorlyqqa qarsy is-qımyl Ulttyq bıýrosynyń Almaty oblysy boıynsha departamentiniń 4-shi qabatynan sekirip, mert bolǵan sheneýniktiń uly oqıǵanyń el bilmeıtin jaıttaryn aıtyp berdi, dep habarlaıdy QazAqparat tilshisi.
«QazSýShar» mekemesiniń Almaty fılıaly boıynsha burynǵy dırektory, marqum bolǵan Seıilhan Muhamadıevtiń uly, ári zańdy qorǵaýshysy Muhıt Muhamadıev ákesin qasaqana óltirdi dep kúdiktenedi. Sebebi, marqum bolǵan sheneýniktiń mańdaıy da shúıdesi de jaralanǵan.
«Birinshiden: Ne sebepti ákemniń shekesimen jáne shúıdesi jarylady? Sonda ol qalaı bolǵany? Shekesimen qulap, ólmeı qalǵan soń, qaıtadan shyǵyp, shúıdesimen qulady ma? Ol qalaı bir bastyń eki jaǵyna da jaraqat keledi? Soǵan bir mardymdy jaýap joq? Ekinshiden: ne sebepti jalań aıaq boldy? Úshinshiden: Sekirgen jerdegi terezede, terezeniń tutqasynda ne sebepti qolynyń izi joq? Terezeni ashqan kezde tutqany ustaý kerek qoı, qoltańbasy turmaq, genetıkalyq tańbasy joq, ol jerde úshinshi adamnyń qolynyń izi bar. Biraq ol adamdy eshkim izdep jatqan joq», - dedi Muhıt Muhamadıev.
Sondaı-aq, jábirlenýshi tarap tańǵy besten tańǵy jetige deıin júrgizilgen tintý barysynda túsirilgen jedel túsirilim toqtatylyp otyrǵanyn aıtady. Al vıdeotúsirilimniń ne sebepti toqtatylǵany, sol sátterde ne bolǵany, qandaı sózder aıtylǵany olar úshin jumbaq. Sonymen qatar, Seıilhan Muhamadıevtiń sońǵy sáti ofıtser Aldabergenovtyń kabınetinde ótkeni de túsiniksiz. Al búgin Astanada Ulttyq bıýro ókilderi brıfıng ótkizip, atalǵan iske baılanysty 8 adamnyń qyzmetinen bosatylǵanyn málim etti.
«Іshki qaýipsizdik basqarmasy ishki qyzmettik tekserý júrgizdi. Qyzmettik tekserý nátıjesi boıynsha, atalǵan derekti jibergen kináli qyzmetkerler departamenttiń aǵa tergeýshisi Asqanov pen asa mańyzdy ister boıynsha ofıtser Aldabergenov jemqorlyqqa qarsy kúres qyzmetinen bosatyldy. Budan bólek qaramaǵyndaǵylardyń is-áreketine baqylaýdyń bolmaǵandyǵyna baılanysty departament basshysy Alıkov jáne onyń orynbasarlary Jurmaǵambetov pen Qarataı, Jedel basqarmanyń basshysy Myrzahmetov, onyń orynbasary Mashekov pen bólim basshysy Býkýrov laýazymdarynan bosatyldy. Jáne de QR QK 105 babynyń birinshi bóligi boıynsha Almaty oblystyq Іshki ister departamenti sotqa deıingi tergeý júrgizýde», -dedi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń resmı ókili Nurlan Jahın.
Alaıda Seıilhan Muhamadıevtiń uly 105 babpen tergeý júrgizilip jatpaǵanyn aıtady.
«Qazir «Ózin-ózi óltirýge deıin jetkizý» ıaǵnı 105 babpen, eshkimdi qýdalap jatqan joq. Osy 105 bapty ózgertip, laýazymdyq ókilettikterdi asyra paıdalaný jáne salǵyrttyq baptary boıynsha is júrgizildi. Men munymen túbegeıli kelispeımin. Bul jerge QR QK 99 baby, «Adam óltirý» babyn qosý kerek. Sebebi, biz ákemiz óz erkimen tórtinshi qabattap sekirip ketti degenge senbeımiz. Ol ondaı azamat emes. Qarap otyrsańyz, Ulttyq bıýro óziniń kinásin moıyndaı otyryp, myna adamdardy beker jumystan shyǵarǵan joq qoı», - dedi Muhıt Muhamadıev.
Esterińizge sala keteıik, atyshýly qaıǵyly jaǵdaı bıyl Taldyqorǵanda aqpannyń úshi kúni bolǵan edi.
«QazSýShar» mekemesiniń Almaty fılıaly boıynsha burynǵy dırektory Seıilhan Muhamadıev 400 myń teńge paramen ustalyp, túnde tergeýde bolyp, tańǵy toǵyzdar shamasynda Sybaılas jemqorlyqqa qarsy is-qımyl Ulttyq bıýrosynyń Almaty oblysy boıynsha departamentiniń 4-shi qabatynan sekirip, qaıtys bolǵan.
