Taldyqorǵanda 25 jastaǵy jigit ózine durys jaýap bermegen beıtanys áıeldi soqqyǵa jyqqan
TALDYQORǴAN.QazAqparat - Taldyqorǵanda polıtseıler ótip bara jatqan adamǵa sebepsiz shabýyl jasaǵan er adamdy ustady, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, 9 qyrkúıek kúni saǵat 08:15 shamasynda Taldyqorǵan qalasy Batys QPB-ne «Mýsheltoı» shaǵyn aýdanynyń 30 jastaǵy turǵynynan habarlama kelip túsken. Ol belgisiz er adamnyń mektep mańynda ózine shabýyl jasap, sebepsiz urǵanyn jetkizgen. Atalǵan derek buzaqylyq faktisi (QR QK 293-b.1-b.) boıynsha tirkeldi.
15 mınýt ishinde oqıǵa ornyna jetken patrýldik polıtsııa qyzmetkerleri-«Búrkit-163» ekıpajy «Jetisý» shaǵyn aýdanynyń 25 jastaǵy turǵynyn ustady. Ol masań kúıde ózine dóreki jaýap bergeni úshin áıelge shabýyl jasap, urǵanyn moıyndady.
Kúdikti buǵan deıin de zańǵa qaıshy áreketterge barǵan. 2017 jyly oǵan qatysty 6,5 jylǵa bas bostandyǵynan aıyrý jazasy taǵaıyndalǵan. Úsh jyl jazasyn ótep, shartty túrde merziminen buryn bosatylyp shyqqan ol quqyq buzýshylyqqa qaıta baryp otyr. Jábirlenýshi azamatsha polıtseılerge buzaqyny tez qolǵa túsirgeni úshin shyn júrekten alǵysyn bildirdi.
