Taldyqorǵanda 23 jastaǵy er adam polıtseıge pyshaq saldy
Almaty oblystyq Polıtsııa departamenti baspasóz qyzmetiniń málimetinshe, ustalǵan kúdikti Kóksý aýdanynyń turǵyny bolyp shyqty. Ol qazir qamaýda otyr. Polıtseıge pyshaq salǵan kúdiktiniń ishimdik ishkeni anyqtaldy.
Almaty oblysy Polıtsııa departamenti 3 mamyr kúni saǵat 01:15-te polıtsııa qyzmetkerlerine Taldyqorǵan qalasynyń turǵynynan avtovokzalda masań kúıdegi er adamnyń otbasylyq janjalǵa baılanysty oǵan qaýip tóndirgeni týraly shaqyrtý kelip túskenin habarlaıdy.
Shaqyrtý ornyna dereý jetken Taldyqorǵan qalasy PB-niń eki ýchaskelik polıtsııa ınspektoryn baıqaǵan kúdikti oqıǵa ornynan jasyrynýǵa tyrysqan.
Quqyq buzýshyny qýyp baryp ustamaq bolǵan tártip saqshysyna «Abaı - Jansúgirov» kósheleriniń qıylysynda ol ýchaskelik ınspektorlardyń birine pyshaq salǵan.
Kóksý aýdanynyń 23 jastaǵy turǵyny ustalyp, qamaýǵa alyndy. Qylmys quraly — as úı pyshaǵy tárkilendi.
Polıtsııa qyzmetkeri Taldyqorǵan qalasyndaǵy aýrýhanaǵa jetkizildi.
«Bılik ókiline qatysty kúsh qoldaný deregi boıynsha QR QK 380-babynyń 2-bóliginde kózdelgen qylmystyq is qozǵaldy», - delingen Almaty oblysy PD baspasóz qyzmeti taratqan habarlamada.