Taldyqorǵanda 200 oryndyq aýrýhana ashyldy
TALDYQORǴAN. QazAqparat - Taldyqorǵanda 200 oryndyq ınfektsııalyq aýrýlar aýrýhanasy ashyldy, dep habarlaıdy QazAqparat tilshisi.
Jańa aýrýhananyń qurylysyna 7,3 mlrd teńge bólingen.
Almaty oblystyq Densaýlyq saqtaý basqarmasynyń basshysynyń Ómirzaq Nııazbekovtiń aıtýynsha, bul nysanda 400-ge jýyq maman jumys isteıtin bolady. Onyń 60-tan astamy joǵary sanatty dárigerler.
Jańa aýrýhananyń ashylýy rásiminde Almaty oblysynyń ákimi Amandyq Batalov Taldyqorǵanǵa kelip jumys isteıtin dárigerlerge kottedjdi qalashyqtan 47 úı beriletinin jetkizdi. Sonymen qatar, oǵan qosymsha 60 páterli úı salynady.
Aıta ketsek, 55 kúnniń ishinde salynǵan aýrýhanada operatsııalyq jáne perzenthana zaldary da qamtylǵan.
«Aqyldy aýrýhana« júıesi bar. Ol árbir patsıenttiń densaýlyq jaǵdaıyn medıtsınalyq personalmen táýlik boıy beınemonıtorlaýdy qamtıdy. Árbir palatada shuǵyl medıtsınalyq kómek kórsetý úshin ottegini qosý núkteleri qarastyrylǵan», - dedi densaýlyq saqtaý basqarmasynyń basshysy.
Bolashaqta aýrýhanada ártúrli juqpaly aýrýlary bar naýqastar emdeledi. Ol úshin barlyq qajetti dıagnostıkalyq jáne zerthanalyq jabdyqtarmen jabdyqtalǵan. Personalǵa arnalǵan úı-jaılar, zerthanalar, kompıýterlik tomografqa, rentgen apparatyna, endoskopııalyq jabdyqqa, ÝDZ jáne elektrokardıografqa arnalǵan jeke kabınetter jasaqtalmaq.
