Taldyqorǵanda 200-ge jýyq saılaýshy úıden daýys berýge ótinish bildirdi

TALDYQORǴAN. QazAqparat - Taldyqorǵan qalasy boıynsha 187 adam úıden daýys berýge ótinish bildirdi, dep habarlaıdy QazAqparat tilshisi.

«Búgingi kúni Taldyqorǵan qalasy boıynsha 187 adam úıden daýys berýge ótinish bildirdi. Olardyń sany taǵy ósýi múmkin. Bul turǵyndardyń úıine saılaý komıssııasynyń jyljymaly jáshigi jetkiziledi», - deıdi Taldyqorǵan qalasy boıynsha saılaý komıssııasynyń hatshysy Marjan Mels.

Resmı ókildiń aqparatyna sáıkes, qazir Almaty oblysynyń ortalyǵynda 58 saılaý ýchaskesi bar. Al saılaýshylardyń sany - 129 641 adam.

Taldyqorǵan qalasy ákiminiń orynbasary Sáýle Arzanbekovanyń aıtýynsha, búgingi kúni jalpy taldyqorǵandyqtardyń sany - 178 200.